Հունիսի 13-ի լույս 14-ի գիշերը տեղացած հորդառատ անձրևները հեղեղել էին Վրաստանի մայրաքաղաք Թբիլիսիի փողոցները: Ջրով էին լցվել անցումները, նկուղները և հարյուրավոր տների առաջին հարկերը։ Նման վտանգ սպառնում է նաև Հայաստանին.
«Ժամանակին տարբեր պաշտոնյաների դիմել ենք՝ ասել ով, որ Գետառը չի կարելի փակել: Բացի Գետառից սելավատար է նաև Հրազդանը: Ամեն գարուն և աշուն անձրևը գալիս է, և քանի որ Գետառը փակ է, ջուրը կողքից ցեխը բերում և լցնում է ԵՊՀ-ի բակ: Այս անձևաջրերը հետո միանում են կոյուղուն: Եվ քաղաքաշինությունը դարձյալ հաշվի չի առել խնդիրները, որովհետև մեծ քանակությամբ անձրևներ, սարերից իջնող ջրային հոսքեր, որոնք ուղղվում են գերծանրաբեռնված կոյուղի, նշանակում է, որ քաղաքը կծածկվի ոչ միայն մաքուր, այլև կոյուղու ջրով»,-լրագրողների հետ հանդիպման ժամանակ ասաց «Հանուն մարդկային կայուն զարգացման» ՀԿ-ի ղեկավար, բնապահպան Կարինե Դանիելյանը:
Նրա խոսքով՝ վտանգված են նաև Հայաստանի մյուս քաղաքները.
«Էկոլոգիական խնդիրները գնալով սրվում են, քանի որ կլիմայի փոփոխություն է տեղի ունենում: Գարնանը կարող է պատահել՝ այնպիսի ջերմաստիճան լինի, որ սարերի ձյունը միանգամից հալչի ու իջնի քաղաքների վրա:
Եվ, քանի որ վերացրեցին անտառածածկ լանջերը, սելավների վտանգը մեծանում է, միանում է նաև սողանքերի վտանգը:
Հիդրոլոգ Ռոլանդ Մանուկյանն էլ շարունակելով վերջինին՝ ասաց.
«Ավան-Առինջում եղած 2 ք/կմ մակերեսով լիճն, օրինակ, լցրել են հողով, բնակավայրեր կառուցել: Մինչդեռ սա բնական գոգավորություն էր, որը սելավների ժամանակ իր մեջ կարող էր որոշակի քանակությամբ ջուր հավաքել»:
Անի Կարապետյան
Կարդացեք նաև՝ Լուրջ էներգետիկ վտանգ կա
