«Ամեն անգամ ստանում ենք ահազանգեր, որ գայլերի հարձակումները գյուղական տնտեսությունների վրա ավելի են սաստկանում: 2012 թվականից սկսած՝ Կառավարությունը 21 միլիոն դրամ է տրամադրում գայլերի որս կատարելու համար, բայց, եթե այդ գումարը տրվեր մի խումբ գիտանակնների, հասարակական կազմակերպությունների, որոնք ունեն պրոֆեսիոնալ մոտեցումներ, կարվեին շատ հետաքրքիր հետազոտություններ ու կփորձեին լուծել խնդիրը: Պետք է կենդանիներին չվնասելով պայքարել նրանց հարձակումների դեմ»,-լրագրողների հետ հանդիպման ժամանակ նման մտահոգություն հայտնեց բնապահպան Սիլվա Ադամյանը:
Նրա կարծիքով՝ պետք է գյուղական տնտեսություններում մշտադիտարկում արվի.
«Այսօր գյուղական տնտեսությունները շատ վատ վիճակում են, գոմերն ամրացված չեն և գյուղացին չունի համապատասխան շներ, որոնք կպաշտպանեն հոտը վայրի կենդանիներից: Հուսով ենք, որ գոնե նոր Կառավարությունը կփոխի իր մոտեցումը, քանի որ լուրջ բնապահպանական, գյուղատնտեսական ու սոցիալական խնդիրներ ունենք»,-նկատեց Սիլվա Ադամյանը:
Շարունակելով վերջինին՝ բնապահպան Կարինե Փանոսյանը հայտնեց, որ հանդիպումներ են ունեցել Բնապահպանության նախկին նախարարների հետ, նամակներ են հղել տարբեր վարչապետների, սակայն ապարդյուն.
«Վերջին նամակն ուղղված է Կարեն Կարապետյանին: Հուսով ենք, որ արագ կարձագանքի ու որոշակի քայլեր կձեռնարկվեն, կփոխվի վերաբերմունքը: Փորձը ցույց է տալիս, որ գայլերի սպանդը հանգեցնում է մարդկային աղետների»,-նշեց բնապահպանը:
Անի Կարապետյան
