Մոսկվա-Երևան ավտոբուսի վթարի հետևանքով վիրավորված երեխաները Ռոստովի մարզից Երևան էին գալիս՝ մրցումների մասնակցելու համար:
Այս մասին հայտնում է «ՌԻԱ Նովոստին»՝ վկայակոչելով Հյուսիսային Օսիայի կառավարության աղբյուրը:
«4 երեխաները Ռոստովի մարզի բնակիչներ են. նրանք Երևան էին մեկնում՝ մրցումների մասնակցելու: Երկուսը գտնվում են ծանր վիճակում, երկուսի վիճակը միջին ծանրության է: Զոհերի թվում կա մեկ կին և 4 տղամարդ, նրանք բոլորը Հայաստանի քաղաքացիներ են»,- ասել է «ՌԻԱ Նովոստի» գործակալության զրուցակիցը:
Հիշեցնենք, որ հոկտեմբերի 14-ին Մոսկվա-Երևան երթուղին իրականացնող ուղևորատար ավտոբուսը Հյուսիսային Օսիայում մայրուղու վրա բախվել է բեռնատարին: Ավտոբուսում եղել է 52 ուղևորը, նախնական տվյալներով` վթարի հետևանքով կա 5 զոհ, 27 վիրավոր: Մահացածների մեջ են նաև երկու վարորդները:
