ՄԱԿ-ի գլխավոր քարտուղար Բան Կի Մունը մտահոգություն է հայտնել սիրիական Հալեպ քաղաքի բնակիչների, մասնավորապես՝ կանանց և երեխաների նկատմամբ վայրագությունների մասին չճշտված հաղորդագրությունների առնչությամբ:
Այդ մասին հաղորդվում է ՄԱԿ-ի պաշտոնական կայքում:
«Բան Կի Մունը հրահանգել է Սիրիայի հարցով ՄԱԿ-ի հատուկ պատվիրակին (Ստեֆան դե Միստուրա) քննարկել իրավիճակը հակամարտությունում ներգրավված կողմերի հետ»,- նշվում է հայտարարությունում:
Կազմակերպությունում հիշեցրել են, որ կողմերը պարտավոր են պաշտպանել խաղաղ բնակիչներին և հետևել միջազգային իրավունքի նորմերին: Ընդ որում՝ չի հստակեցվում, թե վայրագության ինչ դրսևորումների մասին է խոսքը:
Ավելի վաղ հայտնի է դարձել, որ Սիրիայի պետական պաշտոնական աղբյուրները հաստատել են Հալեպ քաղաքի ամբողջական ազատագրումը։
Հալեպի քաղաքապետարանը ձեռնարկել է ազատագրված թաղամասերի մաքրման և վերականգնման աշխատանքներն ու կարգավորում է քաղաքի երթևեկությունը:
Տարվում են ազատագրված շրջանների ականազերծման, ջրի և էլեկտրականության մատակարարման վերականգնման աշխատանքներ:
Հալեպի՝ ահաբեկիչների հսկողության տակ գտնվող թաղամասերի գրոհը սկսվել էր 2016 թվականի նոյեմբերի կեսին:
