«Ապօրինի հարստացման քրեականացման օրենքի հեղինակը եւ պահանջատերը ՀԱԿ-ն է: Ի սկզբանե մենք հայտարարել ենք, որ երկրում թալանին վերջ տալու գործիքներից լավագույնը սա է: Ինչո՞ւ, որովհետեւ ժողովրդի աչքին է երեւում այդ ամենը: Բարձր պաշտոնատար անձինք դղյակներ են կառուցում, շքեղ մեքենաներ են վարում, դաչաներ ունեն, հարստություններ ունեն, ունեցվածքներ արտասահմանում, բայց իրենց ողջ կյանքում ստացել են բավականին ցածր պետական աշխատավարձեր եւ այդ անհամապատասխանությունը պետք է հիմք ծառայի, որ օրինապահ մարմինները անհանգստանան»,- այսօր հայտարարեց ՀԱԿ խմբակցության ղեկավար Լեւոն Զուրաբյանը:
Նրա խոսքերով՝ ապօրինի հարստացման քրեականացման օրենքը հետադարձ ուժ պետք է ունենա եւ այդ մեխնիզմը պետք է տարածել բոլոր պաշտոնյաների վրա՝ ընդ որում 1991 թ-ից սկսած: «Որ ոչ- ոք չկարծի, թե չենք ուզում, որ դա վերաբերի մեզ: Ես Լեւոն Տեր- Պետրոսյանի անունից հայտարարում եմ, ինքը պատրաստ է առաջինը անցնել այդ ստուգումը: Թող փորձեն գտնել որեւէ անհամապատասխանություն իր եկամուտների եւ ունեցվածքի միջեւ՝ չեն գտնի: Բագրատյանի եկամուտների եւ ունեցվածքի մեջ էլ չեն գտնի»,- ասաց ԱԺ պատգամավորը:
Լեւոն Զուրաբյանը հայտարարեց, որ ՀԱԿ-ն իր նախընտրական ծրագրի ամենակարեւոր քայլերից մեկը պետք է համարի հենց այս ապօրինի հարստացման քրեականացմանը հետադարձ ուժի մեխանիզմ գտնելը:
