«Սինջար» եզդիների ազգային միավորման բաց նամակը՝ վարչապետին
Պարոն Կարապետյան, երբ Հայկական Բարեգործական Ընդհանուր Միության կազմակերպած ձեր ասուլիսը պետք է կայանար, մենք ևս որոշեցինք հարց ուղղել ձեզ: Մենք առաջարկեցինք ձեզ հանդիպել ազգային փոքրամասնությունների ակտիվ գործիչների հետ: Երեկ ուրախությամբ տեղեկացա, որ մեր առաջարկը կյանքի եք կոչել և հանդիպել եք ազգային փոքրամասնությունների ներկայացուցիչներին, սակայն զարմանալի էր, որ առաջարկ անող կազմակերպությունից՝ «Սինջար» եզդիների ազգային միավորման և ոչ մի ներկայացուցիչ հրավիրված չէր հանդիպմանը:
Պարոն վարչապետ վստահ ենք, որ դուք չեք ընտրել, թե ովքեր պետք է գան հանդիպման ձեզ հետ: Մենք նաև վստահ ենք, որ ընտրողները հստակ տեղյակ են եղել մեր գործունեությանը և տեղյակ են, որ Հայաստանի Հանրապետությունում եզդի համայնքին վերաբերվող ամենասուր խնդիրները բարձրաձայնում է «Սինջար» եզդիների ազգային միավորումը: Վստահ ենք, որ այս ամենը իմանալով հանդիպումը կազմակերպած ձեր ենթակաները ցանկացել են հեռու պահել ձեզ ճշմարտությունից: Եվ սա ինչ որ իմաստով նաև գնահատական է մեր աշխատանքին, այսինքն մենք ճիշտ ուղու վրա ենք և պետական կառույցները վախենում են մեր արդարամիտ և ճշմարտացի խոսքից:
Պարոն վարչապետ, քանի որ հնարավորություն չենք ունեցել ներկա գտնվելու հանդիպմանը մենք ստիպված ենք հրապարակային բաց նամակի տեսքով բարձրաձայնել այն խնդիրների մասին, որոնք իսկապես մտահագող են: Վստահ ենք, որ ձեզ տեղյակ չեն պահել այն մասին, որ Հայաստանում բնակվող եզդի կանանց մեծամասնության կրթության իրավունքը խախտվում է: Եզդի կանանց կեսից ավելին անգամ չի հասցնում ավարտել դպրոցական ուսուցման ցիկլը: Ձեզ չեն ասել, որ դա արվում է կեղծ ավանդապաշտության անվան տակ և ՀՀ ԿԳՆ ամենաթողության պատճառով: Միևնույն ժամանակ վստահ ենք, որ ձեզ չեն ասել, որ Հայաստանի Հանրապետությունը խախտում է եզդի երեխաների կրոնի ազատության իրավունքը, երբ Հայոց եկեղեցու պատմություն առարկայի միջոցով իրականացվում է քրիստոնեության քարոզ և ոչ քրիստոնյա զանգվածի կրոնափոխություն: Իհարկե մենք կարծում ենք, որ ցանկացած մարդ ազատ է իր կրոնի ընտրության հարցում, սակայն երբ այս կամ այն կրոնը փաթաթվում է դեռևս չձևավորված պատանիների վիզին՝ մեզ համար անընդունելի է: Անընդունելի է, որ դա արվում է աշխարհիկ պետության դպրոցներում և օրենքի կոպտագույն խախտմամբ:
Պարոն վարչապետ իհարկե վստահ ենք, որ դուք որևէ վախ չունեք ուղիղ և ճշմարիտ խոսք լսելու, սակայն խնդրում ենք, ձեր ենթականերին խորհուրդ տալ չվախենալ մեր աշխատանքից: Չփորձեն վախեցնել, լռեցնել: Թող փորձեն լսել և որոշակի գաղափարներ կյանքի կոչել, որոնք վստահաբար ի փառս Հայաստանի Հանրապետության են, որի հպարտ քաղաքացիներն ենք մենք:
«Սինջար» եզդիների ազգային միավորման նախագահ՝ Բորիս Մուրազի
