«Բանակն ու ազգը միաձուլված են, և եթե տեղ-տեղ խաթարումներ են լինում, պետք է այնպես անենք, որ միաձուլվեն: Սա մի նախաձեռնություն է, որը շատ կարևոր է մեր բանակի համար: Միշտ խոսել ենք հրեաների՝ իմաստուն ձևով իրենց կյանքը կազմակերպելու մասին: Նրանք ունեն ազգային տուրք, որ եթե մեկ հրեա չի վճարում, համայնքից դուրս են հանում ու ասում են, որ հրեա չէ»,-խոսելով ՊՆ նախագծի մասին՝ ասաց բանաստեղծ, հասարակական գործիչ Ռազմիկ Դավոյանն ու հավելեց.
«Բազում մտավախությունններ կան, քննարկումներ են լինում, բայց մեկ բան բացակայում է.նախաձեռնությունը մեջտեղ բերող անձի գործոնը: Այն ներկայացրել է Վիգեն Սարգսյանը՝ նախագահի հովանավորությամբ, իսկ ավելի ճիշտ՝ օրհնությամբ: Վիգեն Սարգսյանը բաց է հասարակության առջև, կենսագրության մեջ որևէ բիծ չկա»:
Եվ, քանի որ նախագահի օրհնությամբ բերված նախագիծ է, ուրեմն, բանաստեղծի կարծիքով, մտածել են դրա վերահսկողական լծակների մասին.
«Հույս ունեմ, որ նման հիմնադրամ կլինի նաև ուսանողների, աշակերտների, հիվանդների համար: Եթե այստեղ 1000 դրամի մասին է խոսքը, այս դեպքում էլ թող 200 դրամ հավաքեն»,-նշեց Ռազմիկ Դավոյանը:
Գրականագետ Դավիթ Գասպարյանն էլ ողջունեց գաղափարը, բայց ասաց, որ գուցե նույն գումարը չվճարե՞ն ասենք հիմնարկի տնօրենն ու աշխատողը.
«Պետք է նաև ստվերը բերել հարկային դաշտ ու գումարն ուղղել բանակին»,-նկատեց գրականագետը:
Հիշեցնենք, որ ԱԺ-ում քննարկվում է ՀՀ պաշտպանության ժամանակ մարտական գործողությունների ընթացքում վնասներ ստացած զինծառայողների փոխհատուցման մասին նախագիծը, որով յուրաքանչյուր աշխատողից ամեն ամիս պետք է գանձվի 1000 դրամ:
Անի Կարապետյան
Մանրամասները՝ տեսանյութում
