«Հարգելի տիկին Հայթայան,

որքան էլ հարգեմ Ձեզ ու Ձեր տարիքը և սոլիդար լինեմ, միևնույնն է չեմ կարծում, որ ՀՀ ԱՆ մամլո խոսնակը համաքաղաքացիներին համացանցում արգելափակելով կամ մեկնաբանություններ ջնջելով կարող է վերաձևակերպել ներկայիս ՀՀ ԱՆ նախարարի կողմից մահացած ծննդկաններին վերաբերող հարցերին հնչեցրած (ինչպես դուք եք փորձում բնորոշել «շտապում» էր կամ «սխալմամբ» է ասել) հետևյալ պատասխանը. «Ես մեկ-երկու մահացած ծննդկանի դեպքով չեմ զբաղվում, դրանով զբաղվում են դատական մարմինները: Իմ համակարգը ամբողջ համակարգն է, ոչ թե մեկ-երկու բողոքավոր ծննդկանի բարեկամները՝ հասկացեք դա վերջապես: Մահվան դեպքում զբաղվում է դատավորը, մորգը»:
Չեմ կարծում, որ դուք նույն կերպ կվարվեիք, եթե լինեիք նրա փոխարեն կամ տվյալ խնդրի հետ հենց դուք առնչվեիք... Ինչու չեք ընդունում, որ արդյունքում նա վիրավորեց մարդկանց իր ոչ կոմպետենտությամբ, և առհասարակ ինչ է նշանակում, մարդկանց կյանքի հանդեպ ունեցած այս անտարբեր ու անլուրջ վերաբերմունքը։ Նա ընդգծված հեգնանքով ու արհամարհանքով է պատասխանում այն հարցերին որոնք ոչ հաճելի է համարում։
Իսկ իր խորհրդականներ ունենալուն վերաբերող հարցից ուր էր շտապում նախարարը, որ նրանցից անտեղյակ լինելով պատասխանեց, թե «Ես այսօր կհաշվեմ դրանք և մենք կանդրադառնանք դրան մեր մյուս հանդիպմանը»: Չգիտեմ դուք Ձեր նախարարությունում ինչպես, բայց մենք մարդկանց մասին դրանքով կամ սրանքով չենք արտահայտվում։