«Նման բան պարզապես բացառում եմ»,-ահա այսպես արձագանքեց Երևանի քաղաքապետարանի աշխատակազմի տեղեկատվության և հասարակայնության հետ կապերի վարչության պետ Արթուր Գևորգյանը համացանցում տարածված լուսանկարին, որում երևում է, որ Երևանի ներքաղաքային տրանսպորտներից մեկում գազօջախ է դրված` ավելին այն միացված վիճակում է:
Արթուր Գևորգյանի խոսքով` նախ լուսանկարում չի երևում ավտոբուսի համապատասխան թիվը, և ըստ նրա` քիչ չեն դեպքերը, երբ Երևանում տեղի չունեցած իրադարձությունը համացանցում փորձում են այլ երանգով ներկայացնել` այն դեպքում, որ այդ ամենն իրականության հետ շատ հաճախ կապ ունեցած չի լինում:
«Քանի որ համացանցում տեղ գտած տեղեկությունը հստակ չէ, ապա ես այս ամենը բացառում եմ: Առաջին հերթին, եթե ուղևորներից մեկը գազօջախ միացրած լիներ, վարորդն անմիջապես կկանխեր դա: Բացի այդ` ես կարծում եմ, որ մեր համաքաղաքացիները բավական ադեկվատ մարդիկ են, և եթե ուղևորներից մեկը գազօջախ միացրած լիներ, ապա մյուսները, վստահ եմ, որ դա նույնպես կկանխեին, որովհետև այստեղ խոսքը վերաբերում է բոլորի անվտանգությանը»:
Զրույցի վերջում Արթուր Գևորգյանը հավելեց, որ Երևանի քաղաքապատերանի համապատասխան ծառայության ներկայացուցիչները պարբերաբար մշտադիտարկումներ են անցկացնում, որոնց միջոցով էլ վերահսկվում են, թե որքանով են վարորդները բարյացակամ, արդյոք կանգնում են կանգառներում և այլ նմանատիպ հարցերը, ըստ այդմ էլ` գազօջախի առկայությունը նույնպես չէր կարող վրիպել նրանց աչքից:
Հեղինակ` Լիլիթ Հակոբյան
