Ավ. Իսահակյանի անվան Կենտրոնական գրադարանում  այսօր տեղի ունեցավ ամերիկահայ (Բոստոն) բանաստեղծ Ավիկ Դերենցի աֆորիզմների «Խոհաշխարհ» ժողովածուի շնորհանդեսը:

«Աֆորիզմը շատ ծանր ժանր է: Մեր հայ գրականության մեջ նա, ով առանձին գրքով աֆորիզմներ ունի՝ Ավետիք  Իսահակյանն է: Թումանյանի աֆորիզմները քառյակներն են: Ուշադիր ընթերցողը Չարենցի բանաստեղծություններում անպայման կգտնի աֆորիզմներ: Ինչ վերաբերում է Ավիկ Դերենցին, ապա սրանք ապրված աֆորիզմներ են»,-ասում է գրականագետ Ավիկ Իսահակյանն ու  կարդում.

.Հիշողությունը մարդու ամենօրյա հաշվետվությունն է:

.Սիրելի կինը սիրելի առեղծված է:

Ընթերցվեցին  նաև Ավիկ Դերենցի բանաստեղծությունները, որոնցից մեկը ներկայացնում ենք ձեր ուշադրությանը.

…Քանի սահմանն  աննկուն ոգով,

  Հայոց զինվորն է հսկում քաջարի,

   Իմ երազները չեն մնա անթև,

  Որքան էլ դավի ձեռքը երկարի:

  Դուք իմ հույսերի փարոսն եք արդեն,

  Շողարձակումով հաղթանակների:

 Դուք իմ հավատի շեփորն եք հնչուն,

 Արձագանքներով Հայոց լեռների:

  Փա՛ռք ձեզ առհավետ,

  Փա՛ռք ձեր բազուկին,

  Հայրենի հողի հերո՛ս մարտիկներ:

  Դուք իմ երազի սյուներն եք կանգուն,

  Մեր գալիք ճախրող խրո՛խտ արծիվներ:

Անի Կարապետյան