|
Թարմացում-«Ուժեղ Հայաստան» դաշինքի ընտրական ցուցակում ընդգրկված, ՀԷՑ–ի նախկին տնօրեն Դավիթ Ղազինյանը ձերբակալվել է։ Այս մասին լրտավմիջոցներին հայտնել են Հակակոռուպցիոն կոմիտեից։ ՀՀ հակակոռուպցիոն կոմիտեն հայտարարել էր, թե իր ծառայողների կողմից իրականացված միջոցառումների արդյունքում փաստական տվյալներ էին ստացվել այն մասին, որ «Ուժեղ Հայաստան» կուսակցության Երևանի Արաբկիր վարչական շրջանի գրասենյակում որպես պատասխանատու նշանակված անձինք, ինչպես նաև նույն կուսակցության պատգամավորի թեկնածու գրանցված Դ. Ղ-ն, կուսակցության համակիրների և նրանց հետ համագործակցող մի խումբ անձանց հետ նախնական համաձայնությամբ ընտրողներին խոստացել, ինչպես նաև տվել էին ընտրակաշառք: Դեպքի առթիվ ՀՀ հակակոռուպցիոն կոմիտեում նախաձեռնվել էր քրեական վարույթ:
|
ԿԸՀ-ն բավարարեց Դավիթ Ղազինյանի դեմ ներկայացրած Դատախազության միջնորդությունները, լրագրողների հետ զրույցում ասաց «Ուժեղ Հայաստան» կուսակցության անդամ Դավիթ Ղազինյանի փաստաբանական խմբի անդամ Արամ Վարդևանյանը։
«Կենտրոնական ընտրական հանձնաժողովից որևէ իրավական ակնկալիք ունենալը ողջամիտ չէ։ Այս կառույցը որևէ իրավական հենք չի ուզում պահել։ Երկու միջնորդություն էր ներկայացված, ԿԸՀ-ն երկուսն էլ բավարարեց»,-ասաց Վարդևանյանը՝ նշելով, թե դատարանը քննության առարկա կդարձնի Ղազինյանի ազատության սահմանափակման վերաբերյալ հարցը։
Վարդևանյանն ասաց, թե Դավիթ Ղազինյանին առաջադրված մեղադրանքը վերաբերում էր ընտրակաշառք տալու նախապատրաստությանը.
«Մեղադրանքի բովանդակությունը քաղաքական նպատակ ունի, ես նման միջնորդություն չէի տեսել»։
