ԱԺ ՔՊ-ական պատգամավոր Հասմիկ Հակոբյանը ֆեյսբուքյան տեսաուղերձում անդրադարձել է ՀՅԴ անդամների բնակարաններում իրականացված խուզարկություններին, առգրավված զենքերին։ «Ոչ թե դաշնակցալաններ են նրանք միայն, այլ ահաբեկչության կազմակերպիչներից են հստակ»,- ասել է Հակոբյանը։ Նա իր խոսքը եզրափակել է՝ ասելով․ «Ժամանակն է կրկին փակել Դաշնակցությունը»։

***

ԱԺ նախկին պատգամավոր Աննա Կոստանյանի ֆեյսբուքյան գրառումը․ «ՔՊ-ական այս պատգամավորը կոչ է անում փակել ՀՅԴ կուսակցությունը։ Ծանոթ ձեռագիր Է, չէ՞։ Դեժավյու ապրեցի, պահի տակ գնացի 90-ականներ։
Արդյո՞ք սա պատահականություն է, իհարկե՝ ոչ։ Ալիև-փաշինյան հանդիպմանը զուգահեռ՝ քաղաքացիական պայմանագրի անդամները հակադաշնակցական հուժկու արշավ են շարունակում ցանցերում, միևնույն ժամանակ ուժայինները ներխուժում են ՀՅԴ անդամների տներ, շմոն անում, մարդկանց բերման ենթարկում։ Ներքին ռեպրեսիաները հայ-ադրբեջանական բանակցությունների ֆոնին թշնամական պետությանը հաճոյանալու և «զոհաբերության» պերֆորմանս է, որպեսզի ցույց տան, որ ցանկացած հակաադրբեջանական տրամադրություն Հայաստանում ճնշվում է՝ ի նպաստ ալիև-փաշինյան պայմանավորվածության, ալիևի սրտով ու թելադրանքով»։

***

ԱԺ «Հայաստան» խմբակցության պատգամավոր, ՀՅԴ Շիրակի Մարզային կոմիտեի ներկայացուցիչ Մհեր Մելքոնյանի ֆեյսբուքյան գրառումը․ «Հայաստանի գործող ապազգային իշխանությունը, կորցնելով հասարակական վստահությունը, անցել է քաղաքական հաշվեհարդարի բացահայտ ուղուն։ Խախտելով Սահմանադրությամբ ամրագրված ազատության ու իրավունքների հիմքերը՝ իշխանական վարչակազմը ապօրինի բռնաճնշումներով փորձում է լռեցնել ՀՅԴ-ին, որի պայքարն այսօր ավելի արդիական է, քան երբևէ։
Մենք տեսնում ենք, թե ինչպես է պետությունը վերածվում անձնական վրեժխնդրության գործիքի՝ ընդդեմ այն ուժերի, որոնք կանգնած են ժողովրդի կողքին՝ ի պաշտպանություն ինքնիշխանության, ազգային անվտանգության ու արժանապատվության։
Դաշնակցականների հակաօրինական ձերբակալությունները, քաղաքական հետապնդումները և քարոզչական կեղտոտ արշավները ոչ թե վախեցնելու են մեզ, այլ՝ ավելի են ամրապնդում մեր վճռականությունը։
ՀՅԴ-ն իր գոյության 135 տարիների ընթացքում անցել է ամեն ինչի միջով՝
բռնապետություններ, աքսորներ, արգելումներ, ձեռբակալություններ:
Բայց երբեք չի վախեցել և նահանջել:
Որովհետև Դաշնակցությունը գաղափար է....
Դաշնակցությունը պետականության, ինքնիշխանության և ազգային ինքնության պահպանման վճռական կամքն է՝ իր կազմակերպված և գիտակցված դեմքով։
ՀՅԴ-ն երբեք չի լռել՝ ո՛չ ցարիզմի ժամանակ, ո՛չ օսմանյան բռնապետության և ո՛չ էլ խորհրդային բռնաճնշումների օրոք։
Պատմությունը միշտ մի ճշմարտություն է հիշում՝
նրանք, ովքեր կռիվ են տվել ազգային գաղափարի համար, ապրում են։
Իսկ նրանք, ովքեր փորձել են սպանել այդ գաղափարը՝ նետվել են պատմության աղբանոցը:
Մեր պայքարը շարունակվելու է՝ հանուն Ազատության, Արդարության, Հայաստանի ազգային և հոգևոր ապագայի։
ՀՅԴ-ին լռեցնել չի ստացվելու։ Ո՛չ հիմա, ո՛չ երբեք»: