Փաստաբան Ռուբեն Մելիքյանը ֆեյսբուքյան ուղիղ եթերով հայտնեց, որ «Բագրատ Սրբազանի հետ կապված գործով արդեն 16 կալանավորված կա։ Նրանցից վերջինը Վահագն Չախալյանն է․․․Էլ չեմ խոսում Արթուր Սարգսյանի մասին, որ հիմա Ազգային ժողովում ՔՊ-ն ինչ-որ Մարլեզոնյան բալետ է բեմադրում և ամենևին բացառված չէ, որ նոր մարդիկ էլ ներգրավեն»,-ասաց Մելիքյանը։
Հիշեցնենք «Սրբազան պայքար» շարժման առաջնորդ Բագրատ Սրբազանը և նրա հետ փոխկապակցված անձինք մեղադրվում են ահաբեկչության և իշխանազավթման նախապատրաստման մեջ։

Գլխավոր դատախազ Աննա Վարդապետյանն այսօր ԱԺ արտահերթ նիստում ներկայացրել է «Հայաստան» խմբակցության ղեկավար Սեյրան Օհանյանի և «Հայաստան» խմբակցության քարտուղար Արծվիկ Մինասյանի նկատմամբ հանրային քրեական հետապնդում հարուցելուն համաձայնություն տալու մասին միջնորդագրերը։

Արթուր Սարգսյանի նկատմամբ հանրային քրեական հետապնդում հարուցելուն համաձայնություն տալու մասին միջնորդության քննարկումը և երեք ընդդիմադիր պատգամավորի անձեռնմխելիությունից զրկելու հարցի վերաբերյալ քվեարկությունը կկայանա երկուշաբթի՝ հուլիսի 7-ին։

***

«Ամբողջությամբ կեղծիք է, փուչիկ, դա պայթելու է։ Վստահաբար ասում եմ՝ սա ամբողջությամբ շոու է»,- այս մասին լրագրողների հետ զրույցում նշեց ընդդիմադիր պատգամավոր Արթուր Սարգսյանը՝ անդրադառնալով իրեն առաջադրված մեղադրանքին և դիտարկմանը, որ ԱԺ-ում քննարկվում է իրեն անձեռնմխելիությունից զրկելու և կալանավորելու հարցը։

«Այն, ինչ 2021 թվականին եղավ Սյունիքում մեր նկատմամբ, նույնը հիմա կրկնվում է։ Այն ժամանակ հայտարարեցի, որ դեմ եմ այս իշխանություններին՝ մեր սահմանների անվտանգության հետ կապված, և մեր ժողովրդին ասացի, որ վաղը թուրքը գալու է նստի Իշխանասարում, հետո բոլորը հասկացան, որ ճիշտ էի։ Հիմա ասում եմ՝ այս ամեն ինչը փուչիկ է։

Ես 24 ժամ լինելով Սրբազանի կողքը՝ կարող եմ հաստատել՝ Սրբազանն այդպիսի բառապաշար չունի։

Ձայնագրությունը կտրտված և սարքված է․․․ Սրբազանի կողքին այդպիսի մարդիկ չկան և չեն կարող լինել»,- նշեց Սարգսյանը՝ հավելելով՝ արդեն որոշված է՝ տանելու են կալանքի․ «Պատրաստ եմ, կալանավայրից էլ եմ պայքարելու»։