Թարմացված- Երևանի Սիլվա Կապուտիկյան փողոցում մեքենաների բախման հետևանքով բռնկված հրդեհը մարվել է: Այս մասին տեղեկացնում է ՆԳՆ Փրկարար ծառայությունը:

Նախնական տվյալներով տուժածներ չկան։

Ավելի վաղ տեղեկացրել էինք՝ մայիսի 19-ին՝ ժամը 16:02-ին, Ճգնաժամային կառավարման ազգային կենտրոն ահազանգ է ստացվել, որ Երևան քաղաքի Սիլվա Կապուտիկյան փողոցում ավտոմեքենաներ են բախվել։

Տեղում պարզվել է, որ այրվում են 4 տրանսպորտային միջոցներ, որոնցից 3-ը՝ մարդատար, իսկ 1-ը՝ բետոնախառնիչ։

Հրդեհը մեկուսացվել էր 16։50-ին։

Դիտեք նաև՝

Դիտեք նաև՝ «Հենա` էն կողքը սաղ Ալեն Սիմոնյանինն ա, էս շենքն էլ, էն շենքն էլ Ալենն ա սարքում». ի՞նչ են պատմում շենքի բնակիչները` պայթյունի պատճառների մասին...Տեսանյութն՝ մեր տելեգրամյան ալիքում

***

Թարմացված-«Բետոնախառնիչը հետընթացով բախվել է գազատար խողովակին և սյանը, ինչի հետևանքով հրդեհ է բռնկվել, նաև հնչել է պայթյուն, հարևանությամբ կայանված երեք մեքենաներ ևս հրդեհվել են»,- դեպքի վայրում լրագրողների հետ զրույցում ասաց ՆԳՆ հանրային հաղորդակցության և իրազեկման վարչության պետի տեղակալ Մարտուն Սիմոնյանը՝ հավելելով, որ նախնական տվյալներով տուժածներ չկան։

***

Թարմացված-Բախվել են 4 ավտոմեքենա` 3–ը մարդատար, իսկ 1-ը՝ բետոնախառնիչ, ՆԳՆ–ն մանրամասներ է հայտնել 

Դեպքը տեղի է ունեցել Երևան քաղաքի Սիլվա Կապուտիկյան փողոցում ժամը 16։02–ին։ Դեպքի վայր են մեկնել հրշեջ-փրկարարներ՝ 4 մարտական հաշվարկ։ 

Տուժածների վերաբերյալ տեղեկությունները ճշտվում են։

***

Առնվազն երկու պայթյունի ձայն է լսվել Երևանի կենտրոնում գտնվող փողոցներից մեկում՝ Անտառայինի ուղղությամբ։  Ականատեսներից մեկը պատմել է, որ պայթյունը  Անտառային փողոցում է եղել։ Բետոնամղիչը չի կարողացել բարձրանալ ճանապարհի նեղ մասով, հետ է սահել, շրջվել ու պայթել։ Այս պահին հրշեջները փորձում եմ մարել բռնկված հրդեհը։

Ինֆորմացիան այս հղումով թարմացվում է

Հետևեք նաև մեր տելեգրամյան ալիքին