«Մեր ձևով» շարժման շնորհանդեսի ժամանակ՝ շարժման առանցքային կերպարներից մեկը, ով ամբիոնից ելույթ էր ունենում, ի թիվս տարբեր ոլորտների թվայնացման անհրաժեշտության՝ նաև բառացիորեն ասաց հետևյալը․«Վերջերս արդի խնդիրներից մեկն է, երբ Դատալեքս համակարգը շաբաթը մի քանի անգամ կարող է խափանվել, և դատավորները ոչ թե էլեկտրոնային անկախ վիճակով ներկայացվեն, նշանակվեն, այլ խափանման պատճառով նշանակվեն SMS-ներով կամ զանգի միջոցով»։
Չհասկանալով ասվածի կոնտեքստը և մտածելով, որ քաղաքականությանը ձեռնոց նետած նորաթուխ գործիչը գուցե շատ կարևոր տեղեկատվություն է ասում, Asekose.am-ը դիմեց ԲԴԽ մամուլի խոսնակ Ծովինար Խաչատրյանին՝ վերծանելու ամբիոնից հնչեցրած միտքը, ով խոստացավ պատասխանել հարցին մեր փոխանցած տեսանյութին ծանոթանալուց հետո։
«Դատական դեպարտամենտի մամուլի ծառայութունում փորձեցինք «գաղտնազերծել» միանգամից մի քանի բան՝ խոսողի անուն ազգանունը, մասնագիտությունը, ասելիքի նպատակը։ Այս պահին ունեմ առաջին երկու հարցի պատասխանը՝ Կադարյան Ռոբերտ, ՏՏ ոլորտի մասնագետ։ Ինչ վերաբերում է նրա արտահայտած մտքին, ապա երևի դիմեք արհեստական բանականությանը»,– մոտ կես ժամ անց պատասխանեց Ծովինար Խաչատրյանը։
