Ասուլիսի ժամանակ պատասխանելով շաբաթներ առաջ ՔԿ հրավիրվելու մասին հարցին՝ Գյումրու քաղաքապետ Վարդան Ղուկասյանն ասաց. «ՀՀ-ում չկա մի դատարան, իրավական կառույց, որ ես գործ չունենամ: Չգիտեմ էլ՝ ինչքան գործ կա վրես, չգիտեմ՝ ինչ են սրանք ուզում, ինչ են անում, ոնց են անում... Ինչ ուզում են՝ անեն: Արդարությունը հաղթելու է»:

***

«Միքայել Սրբազանին առաջադրված մեղադրանքին ծանոթ չեմ, վերաբերվում եմ շատ բացասական: 65 տարեկան մարդ եմ, առաջին անգամ տեսա, որ եպիսկոպոս կալանավորեն: Մեկ էլ եղել է 37թ-ին»,- ասուլիսի ժամանակ ասել է Գյումրու քաղաքապետ Վարդան Ղուկասյանը: «Դատապարտում եմ և՛ Բագրատ Սրբազանի, և՛ Միքայել Սրբազանի կալանավորումը»:

Հիշեցնենք՝ Ղուկասյանն ասուլիս է հրավիրել՝ ամփոփելով պաշտոնավարման հարյուր օրը:

«Ամբողջ աշխարհում երկրի բյուջեից ամենաքիչը ՏԻՄ-ին տալիս է ՀՀ-ն՝ 3-4 տոկոս, որը խայտառակություն է»,- ասուլիսի ժամանակ ասաց Գյումրու քաղաքապետ Վարդան Ղուկասյանը: «Քաղաքացին ամեն հարցով առաջինը գնում է քաղաքապետարան, ասում է՝ մեռելս թաղի, կտուրս վերականգնի, դեղերիս հարցը լուծի, ուսման վարձս մուծի... ամեն հարցով դիմում է քաղաքապետարան, բայց չեղած բյուջե է, պետությունը չնչին գումարներ է տալիս: Մայրաքաղաքի բյուջեն 160 մլրդ է, երկրորդ քաղաքինը՝ 7 մլրդ, պատկերացնո՞ւմ եք»,- դժգոհեց Ղուկասյանը:

***

«Էն մարդկանց ընտրեք, որոնք կասեն, որ ՀՀ-ն, ժողովուրդը մեզ համար ավելի թանկ է, քան 10 ընտանիքը: Ամբողջ երկրի ընդերքը պետք է դառնա պետական սեփականություն: Եթե նմանատիպ մարդ կլինի, իրեն կպաշտպանեմ: Չտա Աստված, որ չլինի նմանատիպ մարդ, որովհետև ես չեմ ուզում գնալ ու նմանատիպ հարցերի մեջ մխրճվել, որովհետև դա եզան լուծ է»,- ասուլիսի ժամանակ ասել է Գյումրու քաղաքապետ Վարդան Ղուկասյանը՝ արձագանքելով իր հարցազրույցի վերաբերյալ լրագրողի հարցին: «Եթե տեսնեմ, որ չկա էդպիսի մարդ, իսկ ժողովուրդը վստահի ու ինձնից պահանջի, ասի՝ հայի տղա ես, հենց լավ տղա ես, արի ստանձնի, էդ ժամանակ նոր պատրաստ կլինեմ իմ երկրին ծառայելու: Պատրաստ եմ և կարող եմ: Իսկ եթե չանեմ իմ ասածները, երկու ձեռքս կտրեք: Թե արագ կարգով էս երկիրը ոտքի չկանգնեցնեմ, ուրեմն ես իմ հորս տղեն չեմ»: