Ապրիլի 22-ին Արևմտյան Հայաստանի Տիգրանակերտում (ներկայիս` Դիարբեքիր) տեղի կունենա Ֆրանսիական Le Monde-ի հայազգի լուսանկարիչ Անտուան Ագուջյանի՝ Հայոց ցեղասպանության զոհերի հիշատակին նվիրված «Լռության ճիչը» նկարների ցուցահանդեսը, կներկայացվի նույնանուն գիրքն ու վավերագրական ֆիլմը:
«Աշխատանքը սկսեցի երկրաշարժի ժամանակ, երբ արտասահմանցիների հետ եկել էի Հայաստան՝ օգնության ձեռք մեկնելու իմ հայրենակիցներին: Այդ ժամանակ սիրողական մակարդակով էի նկարում: Երկրաշարժից հետո ստեղծեցինք ծրագիր՝ հաշմանդամ և որբ երեխաներին օգնելու համար: 27 տարվա ընթացքում գնացի այն տեղերը, որտեղ հայ է եղել ու Ցեղասպանությունից հետո կա: Փորձել եմ ներկայումս արված նկարների միջոցով ներկայացնել անցյալը: Պատմական, էսթետիկ միջոցառում է լինելու»,-այսօր՝ լրագրողների հետ հանդիպման ժամանակ ասաց Ագուջյանը:
Լուսանկարչի խոսքով՝ Դիարբեքիրի քաղաքապետարանի հրավերով է ցուցահանդես կազմակերպել, պատճառն էլ կա.
«Քրդերը հակասության մեջ են Էրդողանի հետ»:
Անդրադառնալով հարցին, թե արդյո՞ք չի վախենում Թուրքիայում ցուցահանդես կազմակերպելուց՝ լուսանկարիշը պատասխանեց. «Վախի մասին չեմ մտածում, չնայած համոզված եմ՝ ամեն ինչ հնարավոր է այդ երկրում»:
Ինչ վերաբերում է խորագրին՝ Անտուան Ագուջյանը նկատեց.«Լուսանկարչությունը մի արվեստ է, որը ձայն չունի ու վերնագրել եմ այսպես՝ «Լռության ճիչը»: Այսինքն՝ լռությունը խոսում է»:
Անտուան Ագուջյանը ծնվել է 1961 թվականին՝ Ֆրանսիայում: Նրա մեծ տատն ու պապը Ցեղասպանության ականատեսներից են եղել:
Անի Կարապետյան
