Ֆրանսիական «Յառաջի» փոխանցմամբ՝ Վիեննայում պղծել են Հայոց ցեղասպանության նահատակների հիշատակին կանգնեցված հուշարձանը:
Վիեննայի հայկական ընկերակցությունների խումբն այս առթիվ հրապարակել է հաղորդագրություն, որում ասվում է. «14 տարի անց (2003 ապրիլին էր) Հայոց ցեղասպանության նահատակներին նվիրված Վիեննայի (Իզեռ) հուշարձանը կրկին պղծել են։
Արդարև, նրա երկու երեսները ծածկեցին անարգական և անպատկառ արձանագրություններով։
Վիեննայի հայկական ընկերակցությունների խումբը ամենայն խստությամբ դատապարտում է այս լկտի և զազրելի արարքը և որոշել է բողոք ներկայացնել X-ի դեմ։
Ո՛չ ատելություն, ոչ էլ վրեժխնդրություն կա հայոց սրտերում, բայց ո՛չ մեկը և ոչի՛նչ չպիտի կարենա կասեցնել նրանց Իրավունքի, Արդարության և Ճշմարտության պայքարը։
Այս հուշարձանը պղծելով՝ հարված են հասցրել ո՛չ միայն 1915-ի նահատակների, այլ նաև բոլոր այն հայերի հիշատակին, որոնք Համաշխարհային զույգ պատերազմների ընթացքում նահատակվել են Ֆրանսիայի համար, և որոնց հիշատակին ևս կանգնեցված է այս հուշարձանը։
Վանդալական այս արարքը, որը մաս է կազմում վերջին տարիներին Ֆրանսիայում արձանագրված պղծումների տխուր շարքի, մեզ հուշում է, թե որքա՛ն երկար է Հիշողության պաշտպանության և ժխտողականության դեմ պայքարը, որ այն մնում է այժմեական հարց, և երկրի իշխանություններից պահանջում խիստ պատասխան»։
Նշենք, որ հուշարձանի ետևի կողմի պղծումը կատարված է ավելի ամոթալի խորհրդանիշներով: Զանց կառնենք նկարը:
