ՀՀ սննդամթերքի անվտանգության պետական ծառայության մամուլի քարտուղար Նվարդ Առաքելյանն իր ֆեյսբուքյան էջում, անդրադառնալով երեկ համացանցում հայտնված այն տեղեկությանը, որ Վաղարշապատի դեղատներից մեկում հայտնաբերվել է ադրբեջանական ծագման մանկական կեր, նշել է, որ այն իրականում ուկրաինական արտադրության է:
«ՀՀ ԳՆ սննդամթերքի անվտանգության պետական ծառայությունը ռադիո «Ավրորայի» ահազանգի հիման վրա դիտարկում է իրականացրել Երևան քաղաքի երկու՝ «Ալֆա-Ֆարմ» և «Ռիթմ Ֆարմ» դեղատներում՝ պարզելու «Nutrilon ProNutra» մանկական կերի մակնշման պահանջների համապատասխանությունը սահմանված նորմերին: Նշենք, որ սպառողին անհանգստացրել էին տուփի վրա առկա ադրբեջաներեն նշումները:
Ծառայությունը պարզել է, որ «Nutrilon ProNutra» մանկական կերն արտադրված է Լեհաստանում (տուփի վրա նշված են տեղեկություններ մի քանի լեզուներով, այդ թվում՝ ադրբեջաներեն), և այստեղ չկա որևէ խախտում»,- տեղակացրել է ՍԱՊԾ մամուլի քարտուղարը:
Ըստ նրա՝ փոխարենը՝ դիտարկման ընթացքում արձանագրվել է, որ դեղատներում վաճառվող «Nutrilon ProNutra» մանկական կերի հայերեն մակնշումը թերի է՝ բացակայում են ներմուծողի տվյալները:
ՍԱՊԾ տեսուչների կողմից տեղում կասեցվել է վերը նշված մանկական կերի վաճառքը: Ներմուծողին հանձնարարվել է վերացնել մակնշման բացթողումը:
Նվարդ Առաքելյանը նշում է նաև, որ ամռանը նմանատիպ դեպք ևս եղել է, կրկին հարևանների լեզվով նշումներ կային այս ապրանքանիշի մանկական կերի տարաների վրա, սակայն ստուգումների արդյունքում պարզվել է, որ լեհական արտադրության է:
