«Եթե դուք պատկերացնում եք, որ 3 կամ 10 մլն հայերի հետ կառավարելու փորձ չունեմ․․․ միայն իմ ընկերությունը և մեր գործընկերների հետ հարաբերություններում կառավարել եմ տասնյակ միլիոնների․ պետական հնարավորություններ են պետք, որպեսզի զարգացնենք երկիրը»,- ասուլիսի ժամանակ հայտարարել է Սամվել Կարապետյանը։ «Վստահ եղեք՝ այստեղ նստած հենց հիմա Փաշինյանից տասն անգամ մեծ իշխանություն ունեմ, ինքը մեկ ավտոբուսի մեջ գտնվող մարդկանց իշխանություն ունի, ավտոբուսից դուրս եկան, էլ չկա այդ իշխանությունը»,- հավելել է նա։

***

«Ուժեղ Հայաստան» կուսակցության առաջնորդ Սամվել Կարապետյանին մինչև ձերբակալությունը գործարքի առաջարկ է արվել, որից հրաժարվել է։ Նա այդ մասին ասաց ասուլիսի ժամանակ։

«Մինչև ձերբակալելը, որ 1,000 հոգով հարձակվել էին տան վրա, իրենք բարձր մակարդակով կոնկրետ ինձ արել են առաջարկություն, որ գնամ, սուրճ խմեմ մի տեղ, հայտարարեմ, որ եկեղեցուն չենք պաշտպանելու, դրանից հետո թե՛ ՀԷՑ–ը, թե՛ ամեն ինչը հետ է վերադարձվում։ Ես չեմ ընդունել առաջարկությունը, և գնացել ենք առաջ»,- ասաց Կարապետյանը։

Ավելի վաղ Սամվել Կարապետյանն ասել էր, որ իրեն Մոսկվայի ընկերների միջոցով առաջարկ էր արվել նաև կալանքի 5-րդ օրը։

Ըստ Կարապետյանի՝ իրեն առաջարկվել էր հայտարարել, որ չի մտնելու քաղաքականություն, խոստացվել էր, որ դրանից հետո ամեն ինչ կավարտվի։

***

Իշխանությունների այս գործելաոճն իրենց ներքին ցնցումների արդյունքն է, քանի որ շրջում են մարզերով և տեսնում են, որ կորցրել են ժողովրդի աջակցությունը։ Միակ հույսը դրել են ճնշումների վրա, բայց դա իրենց բացարձակ չի օգնելու. մեկ մարդու ձերբակալում  են, տեղը հազար մարդ է ավելանում, հայկական լրատվամիջոցների խմբագիրների հետ հանդիպմանն ասաց «Ուժեղ Հայաստան» կուսակցության առաջնորդ Սամվել Կարապետյանը։

Հարցին, թե ընդդիմությունը պատրա՞ստ է փողոցային պայքարի՝ Կարապետյանը պատասխանեց.

«Ինձ թվում է՝ ընդդիմությունը պատրաստ է բոլոր տեսակի պայքարներին:

***

«Բոլորին գործակալ են սարքում, բարեկամ երկրներին՝ թշնամի, որպեսզի պայքարեն մեր ժողովրդի դեմ, հայաթափեն ՀՀ-ն․ ունեն հանձնարարություն շեֆից՝ պետք է ՀՀ-ն լցնեն ադրբեջանցիներով»,- ասուլիսի ժամանակ հայտնեց «Ուժեղ Հայաստան»-ի առաջնորդ Սամվել Կարապետյանը։ «Մեր ֆանտազիան չէր հերիքում՝ պատկերացնել Արցախն առանց հայերի, խաղաղ Արցախ ունեցանք՝ առանց հայերի, հիմա կունենանք խաղաղ Սյունիք՝ առանց հայերի․ սրանց վախերի արդյունքն է սա, ոչ մի ձև չունեն պայքարելու»,- հավելեց նա։

***

«Ինձ ոչ ոք չի ուղարկել, ինձ դա ստիպել է անել Փաշինյանը, երբ հարձակվել է մեր եկեղեցու վրա։ Ես անկեղծ պատասխանեցի լրագրողի հարցին ու սկսվեց այն, ինչ սկսվեց»,- ասուլիսի ժամանակ հայտարարել է «Ուժեղ Հայաստան»-ի առաջնորդ Սամվել Կարապետյանը՝ հավելելով, որ իր նպատակը երկիրը զարգացնելն է։

***

Ասուլիսի ժամանակ Սամվել Կարապետյանը խոսեց նաև հրապարակվող ձայնագրությունների մասին։ «Իրենք ձայնագրում են, իրենք ուրախանում են։ Ինչ-որ բան երևի մտածած ունեն, որովհետև էսքան անիմաստ քայլեր եթե անում են, միգուցե ինչ-որ բանի համար անում են։ Կամ ուժայինները արջի ծառայություն են մատուցում Փաշինյանին։ Չգիտեմ»,- ասաց նա։ «Նույնիսկ վստահ եմ, որ կարողանում են ներդնել մեր ակտիվիստների շարքերում իրենց մարդկանց, հետո իրենց մարդկանց ձայնագրում են, տանում, նստեցնում։ Բացատրություն չունեմ»,- հավելեց նա։

***

Մեր ընտանիքի տղաները թե՛ պատերազմի ժամանակ, թե՛ դրանից առաջ աշխատել են, որ իրենք (Փաշինյանը, Պապիկյանը) չզոհվեն, լրատվամիջոցների խմբագիրների հետ հանդիպմանն ասաց «Ուժեղ Հայաստան» կուսակցության առաջնորդ Սամվել Կարապետյանը՝ անդրադառնալով Սուրեն Պապիկյանի հարցադրմանը, թե ինչո՞ւ Կարապետյան ընտանիքի տղաները չեն նահատակվել։

«Իրենք կենդանի մեռելներ են, իրենք ուրիշ ոչ մի խոսույթ չեն կարող տալ հասարակությանը։ Իսկ մենք առաջարկում ենք ծրագրեր, թե ինչպես կարող ենք զարգացնել մեր երկիրը, ինչպես կարող ենք ուժեղացնել մեր անվտանգությունը, որպեսզի մարդիկ չզոհվեն։ Ուզում են, որ բոլոր ընդդիմադիր ուժերը զոհվեն»,-ասաց Կարապետյանը։

Նա առաջարկեց, որ Պապիկյանն ու իր ղեկավարած նախարարությունն ուսումնասիրեն ու տեսնեն, թե Կարապետյան ընտանիքի տղաներն ինչեր են արել։

***

Հայաստանի դեմ հիբրիդային պատերազմ են վարում նրանք, որոնց գլուխներն հիբրիդային են։ Այս մասին հայտարարել է «Ուժեղ Հայաստան» կուսակցության վարչապետի թեկնածու Սամվել Կարապետյանը՝ հայկական լրատվամիջոցների մի խումբ խմբագիրների հետ հանդիպման ժամանակ։

«Դուք ներկայացնելով առաջատար լրատվամիջոցները, նման պատերազմներ զգացե՞լ եք այլ երկրներից։ Ես տեսնում եմ, որ նրանց գլուխները հիբրիդային են։ Նույնիսկ հայերի նորմալ գլուխներ չեն։ Ահա սա է հիբրիդը։ Ամենօրյա նարատիվներ, բոլորն իրենց համար գործակալներ են»,- հայտարարեց Կարապետյանը։

Մեկնաբանելով ՌԴ հատուկ ծառայությունների հետ իր առնչության մասին լուրերը՝ Կարապետյանը նշեց, որ Ռուսաստանում ապրած 35 տարիների ընթացքում «ոչ մի ФСБ-ականի» չի տեսել։

***

Հունիսի 8-ից հետո մենք ունենալու ենք ամենաապահով երկիրը, զարգացնելու ենք մեր բանակը, լրատվամիջոցների ներկայացուցիչների հետ հանդիպմանն ասաց «Ուժեղ Հայաստան» կուսակցության առաջնորդ Սամվել Կարապետյանը։

«Մենք ծրագիր ունենք՝ զարգացնելով բանակը հասնել նրան, որ մեր ժամկետային ծառայությունը հասցնենք մեկ տարվա։ Մենք հասնելու ենք դրան ընդամենը մեկ տարվա ընթացքում։ Գիտեմ, որ իշխանությունները լուրեր են տարածում, թե մենք ծառայությունը նորից երկու տարի ենք դարձնելու, բայց մենք հակառակն ենք անելու, ժամկետային ծառայությունը դարձնելու ենք մեկ տարի»,-ասաց Կարապետյանը։