«Հայաստանի փոքրիկ երգիչներ» երգչախումբն առաջարկ է ստացել ճապոնական հայտնի «JVC Kenwood Victor Entertainment Corporation» ձայնագրության խոշոր  կազմակերպությունից՝ ձայնագրել ճապոնական երգերի խտասալիկ:

Պարզվում է՝ 2016 թվականին, երբ երգչախմբի 6 սաներ հատուկ հրավերով մեկնել են Ճապոնիա՝ մասնակցելու «Երգ Ճապոնիային» հեռուստատեսային ծրագին և արժանացել «Հանդիսատեսի համակրանք» մրցանակին,  Victor Entertainment-ի պրոդյուսեր Հիրոշի Նագանոն տեսնելով սա՝ տպավորվում է, և սկսկում է բանակցությունները՝ ձայնասկավառակ թողարկելու համար: 

«Այս նախագծում բոլոր երգերը ճապոներեն են և այն շատ բարդ նախագիծ է: Երեխաները հիմնականում կատարում են այնպիսի փոփ ժանրի երգեր, որոնք հիթեր են Ճապոնիայում»,-լրագրողների հետ հանդիպման ժամանակ ասաց Հիրոշի Նագանոն:

Շարունակելով վեջինին՝ «Հայաստանի փոքրիկ երգիչներ»-ի ղեկավար Տիգրան Հեքեքյանը հավելեց.

 «Ծրագրի իրականացման համար ձայնագրող անձնակազմը հունվարի 27-ից Հայաստանում է, 10 երգ պետք է ձայնագրենք: Ձայնագրման համար նախատեսված է  4 օր»:

Խմբի հետ Հայաստան է ժամանել նաև օպերատոր, որը նկարահանում է Հայաստանի տեսարժան վայրերը: Արդեն եղել են պատմության թանգարանում, Մատենադարանում, Գառնիում և Գեղարդում և իրենց գովազդային հոլովակում կներկայացնեն, թե ինչպիսի երկիր է Հայաստանը:

«Մեզ տպավորեց Հայաստանի պատմությունը, քաղաքակրթությունը: Քիչ առաջ Պատմության թանգարանում շրջելիս մտածեցինք՝ արդյո՞ք ներկայիս Ճապոնիայի քաղաքակրթությունը չի եկել Հայաստանից»:

Անի Կարապետյան