Նորընտիր նախագահ Թրամփի դեմ բողոքի ուսանողական ցույցեր տեղի ունեցան ԱՄՆ Կոնգրեսի մոտ, երբ Փոլ Ռայանը վերընտրվեց ԱՄՆ Ներկայացուցիչների պալատի խոսնակի պաշտոնում:
«Բարի գալուստ նոր միավորված հանրապետական կառավարություն: Հաճելի է ասել դա: Սա լինելու է մի կառավարություն, որը նորընտիր նախագահ Թրամփի հաղթանակը վերածելու է իրական առաջընթացի հանուն ամերիկյան ժողովրդի: Մեր թիմը շատ ոգևորված է և անհամբեր սպասում է աշխատանքի անցնելուն», - ասել է Ռայանը:
Հանրապետականները մտադրված են նվազեցնել հարկերը, վերանայել նախագահ Բարաք Օբամայի առողջապահության մասին օրենքի դրույթների մեծ մասը և ազատականացնել տնտեսությունը: Նրանք ոգևորված են, այն առումով, որ Գերագույն դատարանի թափուր տեղի համար նշանակումը անելու է Թրամփն, այլ ոչ թե դեմոկրատ Հիլարի Քլինտոնը:
«Թեկնածուի առաջ քաշումից հետո մենք արագ առաջ կշարժվենք»,- ասել է սենատոր Ջոն Քորնին:
Դեմոկրատները քննադատել են Թրամփի առաջին քայլերը՝ կապված նախագահի գլխավոր քաղաքական խորհրդականի պաշտոնում Սթիֆ Բանոնին նշանակելու հետ:
«Նա հայտնի է իր ծայրահեղական գաղափարներով»,-ասել է սենատոր Դեբի Սթեյբնաուն:
«Անհնար է լուրջ ընկալել Թրամփի փորձերն՝ ուղղված երկրի իրավիճակի բարելավմանը, քանի դեռ ռասիստական գաղափարները ներկա են Սպիտակ տանը», - ասել է սենատոր Հարի Ռիդը
Հանրապետականներն ասում են, որ սեփական թիմ ձևավորելը Թրամփի իրավունքն է:
«Ամերիկյան ժողովուրդը քվեարկեց և ընտրեց իր հաջորդ նախագահին»,- ասել է սենատոր Ջոն Քորնին
Սակայն Թրամփի դեմ բողոքի ցույցերը դեռ շարունակվում են:
«Ես մտահոգված եմ նրա պատ կառուցելու մտադրությամբ, ինչպես նաև Մատչելի առողջապահության ծրագրի վերաբերյալ նրա մոտեցումների հետ կապված: Ինչպե՞ս է մեր երկիրը վերապրելու այս գալիք չորս տարիները»,- ասում է բողոքարար Օլաեդո Ուքեքվեն:
Հանրապետականներին, սակայն, հայտնի չէ, թե ինչպես Թրամփը կվարվի այն բևեռացված զանգվածի հետ, որը օգնեց նրան ընտրվել նախագահ: Երդման արարողությունից հետո այն կարող է խանգարել նրան՝ առաջ տանելու իր օրենսդրական օրակարգը:
