Շիրակի պետական համալսարանի ռեկտոր Սահակ Մինասյանի հրաժարականի պահանջով բողոքի ակցիաները շարունակվում են: Սահակ Մինասյանը, սակայն, հայտարարում է, որ չի պատրաստվում հրաժարական տալ և դա կանի միայն հիմնավոր փաստարկների առկայության դեպքում: Նրան մեղադրում են բուհի միջոցները վատնելու, կաշառակերության ու կոռուպցիայի մեջ:
Այսօր լրագրողներին հերթական անգամ հանդիպեցին ռեկտորի որոշմամբ աշխատանքից հեռացված դասախոսներ Գագիկ Համբարյանը, Հովհաննես Խորիկյանն ու պրոռեկտոր Անահիտ Ֆարմանյանը՝ հույս ունենալով, որ նոր կառավարությունը, իրավապահ մարմինները կզբաղվեն այս հարցով:
«Անօրինականությունների դեմ մեր պայքարը սկսվել է 8 ամիս առաջ: Խախտվել է բուհի կանոնադրությունը, կատարվել են տարատեսակ հանցագործություններ՝ կապված գնումների, շինարարության հետ: Օրինակ՝ 118 միլիոն դրամ է պահանջվել՝ համալսարանի դահլիճի վերանորոգման համար, ճաշարանի համար՝ 25 միլիոն դրամ և այլն: Ուսումնական տարվա սկսվելուց 3 ամիս անց պարոն Մինասյանը համալսարանից վտարեց 7 տղա ուսանողի, ովքեր օգտվում էին տարկետման իրավունքից: ՄԻնչև հիմա ոչ ոք չի պատժվել: Բոլորի համար զարմանալի կլինի, եթե իմանա, որ դասաբաշխումներն ու ուսումնական պլանները հաստատվել են ուսումնական տարվա սկսվելուց 1 ամիս անց՝ հոկտեմբերի 2-ին, այն դեպքում, որ ամռանն են հաստատվում»,-ասաց Գագիկ Համբարյանը:
Հովհաննես Խորիկյանն էլ հավելեց.
«Մեր պայքարը մշտապես ուղեկցվել է դասադուլներով: 2018թ. փետրվարին ես հացադուլ էի հայտարարել. քանի որ ռեկտորը ամբիոնների վարիչների և դեկանների ոչ լեգիտիմ ընտրություն էր կատարում: Պահանջեցի հանդիպում ԿԳ նախկին նախարար Լևոն Մկրտչյանի հետ, բայց արձագանք չեղավ: Ավելի ուշ երբ հանդիպեցի Լևոն Մկրտչյանին՝ ասաց, թե ի՞նչ ես մտածում, եթե հացադուլ ես հայտարարում, ես գայի Գյումրի, հանդիպեի քեզ հետ, վաղը այլ բուհերում էլ նման բաներ կլինեն, հիմա պետք է շրջագայե՞մ ամբողջ հանրապետությունում: Ինչ վերաբերում է ռեկտորին, ապա նա միայն իր շահի մասին է մտածում: 15 տոննա գիրք ոչնչացրեց 300.000 դրամի համար, այն դեպքում, որ մեկ հատորը հիմա գրախանութներում 15.000-30.000 դրամ է: Դրանք թուրքերեն-ռուսերեն, պարսկերեն-հայերեն բառարաններ էին և այլն: Որպես պատմաբան՝ ապշած եմ, որ հայ մարդը կարող է ատել գիրքն ու գրականությունը: Նրա նպատակը համալսարանը «Շիրակ մոլ» դարձնելն է: Նշեմ, որ ռեկտորի հետ միասին պատասխանատվություն է կրում Հոգաբարձուների խորհրդի նախագահ Ֆելիքս Ցոլակյանը»:
Անահիտ Ֆարմանյանն էլ ընդգծեց, որ մեկ տարվա մեջ համալսարանում 2 անգամ կառուցվածքային փոփոխություն է կատարվել, իսկ նպատակն աշխատողներից ազատվելն է եղել:
«Այս փոփոխությունների արդյունքում 1 օրվա մեջ աշխատանքից հրաժարվեց 21 ամբիոնի վարիչ, 6 դեկան»:
Անի Կարապետյան
Մանրամասները՝ տեսանյութում
