«Այս ցույցերից հետո աշխարհը սկսեց մեզ ճանաչել ոչ միայն որպես քրիստոնեությունն առաջինն ընդունած կամ Ցեղասպանության ենթարկված ժողովրդի, այլև որպես մեծ կամքի ուժ ունեցող և բարոյական չափանիշներով ապրող ազգի»,-լրագրողների հետ հանդիպման ժամանակ ասաց երաժիշտ Եղիշե Պետրոսյանը՝ հավելելով.
«Արտերկրից ինձ շատերն են զանգում, գրում: Ասում են՝ այսքան մարդ փողոցում լինի ու անկարգություններ չլինե՞ն: Սա ինչ-որ որակի մասին է խոսում, որը մենք ունեինք, սակայն թաքնված էր, խեղդված: Հայի գենը խոսեց և մենք պետք է շարունակենք այս մակարդակով»:
Օպերային երգչուհի Հասմիկ Պապյանն էլ նշեց, որ այս հեղափոխությունը նաև մշակութային էր.
«Այս երիտասարդներին պետք է ուղղորդել: Երբ Նիկոլ Փաշինյանին հարցրին՝ ռուսամե՞տ է, թե՝ արևմտամետ, նա պատասխանեց, որ հայամետ է: Բոլորս պետք է կառչենք այդ խոսքից եւ դառնանք իսկապես հայամետ, քանի որ սա շատ կարևոր է՝ ավանդույթները չկորցնելու, կորցրածն էլ վերականգնելու համար: Հայի գենն արթնացել է, պետք է ճանապարհ տալ»:
Հարցին, թե կցանկանա՞ր լինել ՀՀ Մշակույթի նախարար, քանի որ ամիսներ առաջ այդ թեման շոշափվել է, երգչուհին պատասխանեց.
«Նման հավակնություններ չունեմ: Ես պատրաստ եմ ցանկացած ձևով օգնել, իմ փորձը փոխանցել երիտասարդներին՝ թեկուզ խորհուրդներով»:
Անի Կարապետյան
