Asekose.am-ը,  հղում անելով կայքերից մեկին, գրել էր, թե քաղաքացին  իրավապահներին հայտնել է, որ ՀՀ առողջապահության նախարարության «Ճառագայթային բժշկության և այրվածքների գիտական կենտրոն» ՓԲԸ-ի տնօրեն, 68-ամյա Ն.Դ.-ն օգտագործել է իր պաշտոնեական դիրքը և կատարել մի շարք չարաշահումներ:

Այսօր ստացել ենք նշված առողջապահական ընկերության  բաժանմունքների վարիչների նամակը, որը ներկայացնում ենք Ձեր ուշադրությանը: 

Կարդացինք Ձեր կայքում հրապարակված հոդվածը ՀՀ ԱՆ «Ճառագայթային բժշկության և այրվածքների գիտական կենտրոն» ՓԲԸ-ում տեղի ունեցող իրադարձությունների մասին:

Ցանկանում ենք որոշ պարզաբանումներ տալ: 

Կենտրոնի ավտոմեխանիկ Արմեն Բալայանին բոլորս շատ լավ ճանաչում ենք, սակայն վերջին 3-4 տարվա ընթացքում նրան սթափ վիճակում  չենք տեսել: 

Բոլորս տեղյակ ենք, որ մարտ ամսից սկսած կենտրոնի տնօրինությունը առաջարկել է նրան օրինականացնել իր ծավալած ապօրինի գործունեությունը հիվանդանոցի տարածքում, քանի որ նա զբաղված է դրսից եկած ավտոմեքենաների վերանորոգումով և վերականգնումով: Առաջարկվել է, որ նա դուրս գա աշխատանքից, ձևակերպի իր գործունեությունը որպես անհատ ձեռներեց պետ-ռեգիստրում, գրանցվի հարկային մարմիններում, կենտրոնի հետ կնքի վարձակալության պայմանագիր և իր գործունեությունը իրականացնի օրենքի սահմաններում:

Այդ առաջարկը նրա մոտ առաջացրեց ոչ ադեկվատ և ագրեսիվ ռեակցիա:

Նման ագրեսիայի նոպաների ժամանակ բազմիցս մեր ներկայությամբ սպառնացել է բողոքել տարբեր իրավապահ մարմիններին այն մասին, որ նա իբր աշխատավարձ չի ստանում և հավելյալ գումար է տալիս կենտրոնի այն ժամանակվա տնտեսական գծով տնօրենի տեղակալին՝ ամեն անգամ նշելով տարբեր թվեր` 20000-ից մինչև 50000 դրամ ամսեկան: Եզակի սթափ եղած ժամանակ երբ որ հարցրել ենք իրողության մասին նա մեղանչել է, որ իբր հարբած է եղել, չի հիշում ինչ է ասել, ու որ նման բան չկա: Նաև խիստ կասկածելի է նրա տառաճանաչ լինելը և մեզ պարզից էլ պարզ է , որ բողոքը նա ինքնուրույն ի վիճակի չէր գրել, ավելին՝ հնարավոր է նաև, որ բողոքի որոշ կետերին առհասարակ  ծանոթ չի: 

Այս ամենի հիմքում վենդետա է, որի հեղինակը կենտրոնի կոլեկտիվի կողմից պաշտոնապես անվստահության արժանացած բուժգծով տնօրենի տեղակալ Արտյոմ Թադևոսյանն է:

Ընդլայնված բժշկական խորհրդի որոշումը նրան անվստահություն հայտնելու մասին առկա է կենտրոնի քարտուղարությունում, անհրաժեշտության դեպքում կարող ենք կրկնօրինակները տրամադրել:

Ա. Թադևոսյանը ևս` տեղեկանալով այդ որոշման մասին (քանի որ նա չցանկացավ բուժխորհրդի նիստին ներկա լինել), բացահայտ և բարձրաձայն սպառնացել է «քարը քարին չթողնել կենտրոնից», ինչպես նաև քրեկան պատասխանատվության ենթարկել բժշկական խորհրդի անդամներին, որից հետո գնացել է իրեն հասանելիք հերթական արձակուրդի:

Ա. Թադևոսյանի համար դժվար չէր կազմել գրագետ դիմում իրավապահ մարմիններին, քանի որ նախքան մեր կենտրոն գալը նա երկար տարիներ զբաղեցրել է Սիսիան ԲԿ-ի տնօրենի պաշտոնը, որը և բարեհաջող հասցրել է սննկացման և լուծարման եզրին:

Մենք ` կենտրոնի բժիշկներս, չենք կարող տեղյակ լինել կենտրոնի տնտեսական գործունեության մասին:

Մեզ համար ավելի կարևոր է, որ մեզ մոտ ստեղծված են հնարավոր բոլոր պայմանները մեր մասնագիտական գործունեությունը ծավալելու և կարևոր գիտական նախագծեր իրականացնելու համար:

Սակայն ենթադրում ենք, որ առողջապահության համակարգի ցանկացած պետական կամ մասնավոր կազմակերպության համալիր  ստուգումները ի հայտ կբերեն նմանատիպ պրոբլեմներ, հաշվի առնելով որ այդ կազմակերպությունները գործել են նախկին իշխանությունների կողմից ստեղծված պետական ռեկետի և կոռուպցիայի պայմաններում, որից ձերբազատվելու համար մենք իրագործեցինք մեր թավշյա հեղափոխությունը՝ հավատալով Նիկոլին, որ վենդետա չի լինելու: Կրկնակի ցավալի է մեզ համար, որ արդեն նոր իշխանության ենթակա իրավապահ մարմինները հերթական անգամ թիրախավորել են մեզ՝ բժիշկներիս:

Եթե կարելի է պաշտոնապես ներել դատաիրավական համակարգի նախկին սխալները, թեկուզ և նրանք լինեն ճակատագրական կամ հանցավոր, ապա ինչու չի կարելի ներողամիտ լինել մեր հանդեպ և մեր համագործակցությունը սկսել անցյալի տհաճ բծերից մաքրված:

Հարգանքներով `         

Այրվածքային բաժանմունքի վարիչ՝   Կ. Յու. Բաբայան   

Վերակենդանացման բաժանմունքի վարիչ՝  Հ.Հ. Ասլանյան       

Լաբորատոր ախտորոշիչ բաժանմունքի վարիչ՝ Դ.Ս. Գրիգորյան