«Արայիկ Խանդոյանի եղբորը՝ Արարատ Խանդոյանին, ով առողջական խնդիրներ ունի,  հունվարի 26-ին  Նուբարաշեն ՔԿՀ-ում  ներքին կանոնները խախտելու համար տեղափոխել էին պատժախուց, որտեղ անմարդկային պայմաններ էին, կոտրված էին պատուհանների ապակիները»,-լրագրողների հետ հանդիպման ժամանակ ասաց նրա պաշտպան Արա Ղարագյոզյանը՝ հավելելով, որ սա արդեն 2-դ դեպքն է և մինչ օրս թե՛ Արդարադատության նախարարությունից, թե՛ քրեակատարողական վարչությունից որևէ պատասխան չի ստացել:

«Այժմ Արարատ Խանդոյանին իր խուց են տեղափոխել»,-նշեց պաշտպանը:

Անդրադառնալով դատավարությանը՝ պաշտպանը նկատեց.

«Դրանք շատ ծիծաղելի են: 6-րդ վարչության աշխատողը, ով ոչինչ չի հիշում,  միայն գիտի, որ Արարատ Խանդոյանը հարվածել է,  պաշտպանյալիս դեմ ցուցմունք տալուց հետո պաշտոնի բարձրացում է ունեցել: Իսկ մյուս ոստիկանները, որոնք որպես տուժող են ներգրավված՝ չեն տեսել, թե Խանդոյանը որևէ մեկին հարվածել է, թե՝ ոչ»:

Արա Ղարագյոզյանը հաղորդեց, որ ապօրինի կալանքի վերաբերյալ որոշումներն ուղարկվելու են Եվրոպական դատարան:

Նշենք, որ արդեն 7 ամիս անազատության մեջ գտնվող Արարատ Խանդոյանը մեղադրվում է ոստիկանի վահանը քաշելու մեջ։

Անի Կարապետյան