«Ռոսսիա» տոնավաճառի աշխատակիցները բողոքի ակցիա են իրականացնում: Նրանց վերջնաժամկետ են տվել՝ իրենց զբաղեցրած առևտրային տարածքները լքելու համար:

Հասարակական-Քաղաքական գործիչ Անի Կարապետյանը ֆեյսբուքյան իր էջում հայտնել էր. «Սուքիասյանների ընտանիքին պատկանող «Ռոսսիա» տոնավաճառում գործող հազարավոր վարձակալներ կանգնած են լուրջ սոցիալական աղետի առաջ։ Շրջանառվող տեղեկությունների համաձայն՝ տոնավաճառի տարածքներում աշխատողներին այսօր տրվել է վերջնաժամկետ մինչև մարտի 15-ը՝ տարիներ շարունակ զբաղեցրած իրենց առևտրային տարածքները ազատելու համար։
Հազարավոր քաղաքացիներ, որոնց մի մասը շուրջ 15-20 տարի աշխատել է նույն վայրում, այսօր հայտնվել է փաստացի գոյաբանական խնդրի առաջ։ Մարդիկ կանգնած են գործազրկության, վարկային պարտավորությունների չկատարման և իրենց ընտանիքների սոցիալական փլուզման իրական վտանգի առջև։ Շատերի համար սա պարզապես բիզնեսի կորուստ չէ, այլ ապրուստի միակ աղբյուրի լիակատար կործանում։
Ըստ նույն տեղեկությունների՝ տարածքների ազատումը պայմանավորված է «Ռոսսիա» տոնավաճառը քանդելու և հարակից մոլը ընդլայնելու ծրագրերով։ Սակայն այս գործընթացն իրականացվում է առանց քննարկման, առանց վարձակալների հետ իրական բանակցությունների և առանց որևէ սոցիալական երաշխիքի այն մարդկանց համար, ովքեր տարիներ շարունակ ապահովել են այդ տարածքի տնտեսական կյանքը։
Ստեղծված իրավիճակը հերթական անգամ բացահայտում է իշխանությունների՝ Խաչատուր Սուքիասյանի դեմքով, իրական վերաբերմունքը սեփական քաղաքացիների նկատմամբ։ Երբ հազարավոր մարդիկ մեկ օրում զրկվում են իրենց աշխատանքից, իսկ պետական կառույցները լռում են, ակնհայտ է դառնում, որ փոքր և միջին բիզնեսը այս երկրում փաստացի քանդվում է պետական մակարդակով։
Այս համատեքստում առաջանում է լուրջ և մտահոգիչ հարց․ արդյո՞ք հայ փոքր ու միջին ձեռնարկատերերին սնանկացնելով ճանապարհ չի հարթվում նոր բիզնես ծրագրերի համար, որոնք կծառայեն Խաչատուր Սուքիասյանի և նրա գործընկերների՝ այդ թվում թուրք և ադրբեջանական կապիտալի ներկայացուցիչների շահերին։ Ու՞մ համար է կառուցվում «նորը», և ինչու է դրա գինը վճարում հենց հայ փոքր ու միջին բիզնեսի ներկայացուցիչը։
Ըստ տեղեկությունների՝ վաղը առավոտյան տուժած քաղաքացիները նախատեսում են հավաքվել «Ռոսսիա» տոնավաճառի դիմաց։ Սա բողոք է ոչ թե լավ կյանքից, այլ անելանելի վիճակից։ Երբ մարդուն զրկում են աշխատանքից և ապրուստի հնարավորությունից, բողոքը դառնում է վերջին միջոցը»։

«Նորմալ չի այսքան մարդու անգործ թողնել: 30 տարուց ավել մարդիկ այստեղ տեղ են դրել աշխատում են: Թող վերանորոգեն, բայց վերանորոգելուց հետո գոնե այս մարդիկ իրանց տեղերը ունենան: Արդյո՞ք արժի 3-4 բրենդի համար այսքան ժողովրդի թողնել անգործ»,- «Ռոսիա Մոլ»-ի աշխատակիցների ակցիայի ժամանակ ասել է առևտրականներից մեկը՝ հավելելով. «Սա էլ ա Խաչատուր Սուքիասյանինը: Այսքան տարի մենք զարգացրել ենք նրա բիզնեսը»:

«Խնդիրը նրանում է, որ սրահն ուզում են տալ մի քանի բրենդի, իսկ այսքան մարդ մնում է առանց գործի», այսօր «Ռոսսիա Մոլ»-ի աշխատակիցների բողոքի ակցիայի ժամանակ ասաց առևտրականներից մեկը։ «Մարդիկ վարկերի տակ են, փողեր են դրել այս գործում, մենք համաձայն ենք, թող վերանորոգեն՝ մեկ ամիս կսպասենք, թող վարձի գինն էլ միքիչ ավել լինի, բուտիկներ սարքեն ու տան նույն այս մարդկանց։ 30 տարի մարդիկ այստեղ աշխատել են, ինչ պայմաններում ասես, որ չեն աշխատել՝ վերևից ջուր է կաթացել, ապրանք է փչացել, ցրտին, տաքին՝ առանց կանդիցիոներ, հիմա էլ թող սարքեն ու ժողովրդին տեղավորեն»,- ավելացրեց աշխատակիցը։

***

«Ռոսիա» տոնավաճառի աշխատակիցները ստորագրահավաք են անում` պահանջով, որ վերանորոգումից հետո տաղավարները կրկին իրանց տան. աշխատակիցներից մեկը նշեց, որ նաև պահանջում են մեկ տարի ժամանակ տրամադրեն իրենց, որ ներկրված ապրանքի հարցը լուծեն։ 

Աշխատակիցներից ոմանք այս պահին ներսում տոնավաճառի ղեկավարության հետ քննարկման են մասնակցում։ Բայց զուգահեռ պարբերաբար գալիս համոզում են, որ աշխատակիցները ներս մտնեն։