Երևանի Շառլ Ազնավուրի անվան հրապարակում «Հայաստանի պատանեկան նվաճումներ» կազմակերպությունն իրականացրել է «Աշակերտական գործարար ընկերությունների տոնավաճառ» միջոցառումը, որը կազմակերպվել է «Ձեռնարկատիրական և քաղաքացիական կրթություն” ծրագրի շրջանակներում:
Տոնավաճառին մասնակցել են «Ձեռնարկատիրական և քաղաքացիական կրթություն» ծրագրի ավելի քան 40 դպրոցների լավագույն աշակերտական ընկերությունների ներկայացուցիչներ Երևանից և հանրապետության բոլոր մարզերից:
Տոնավաճառը կրթական ծրագիր է, որի շնորհիվ աշակերտները հնարավորություն են ունենում իրենց գործարար ընկերությունների արտադրանքները ներկայացնել սպառողներին և ցուցադրել այն գործարար – ձեռներեցական հմտությունները, որոնք ձեռք են բերել ուսումնառության ընթացքում:
Հարուստ և բազմազան էր աշակերտների կողմից տոնավաճառին առաջարկված տեսականին` զարդեր, խոհանոցային և դպրոցական պարագաներ, խաղալիքներ, հուշանվերներ: Սպառողների ուշադրությունը հատկապես գրավել են Վարդենիկի դպրոցի աշակերների կողմից 3D տպիչներով արտադրված հեռախոսային աքսեսուարները, որոնք ոչ միայն ունեին լավ որակ այլ նաև գեղեցիկ էին և նորաձև: Հետաքրքիր առաջարկ էին ներկայացրել Կապանի թիվ 3 դպրոցի աշակերները: Նրանք իրենց արտադրանքն անվանել են «պայուսակ- տրանսֆորմեր»: Այդ պայուսակը հեշտությամբ կարելի է ձևափոխել և օգտագործել անգամ որպես խոհանոցային գոգնոց: Ինչպես ամեն տարի`ամենահամեղ տեսականին սպառողներին ներկայացրել են Մեղրիի և Ագարակի ձեռներեց աշակերները` վաճառքի հանելով իրենց այգիների քաղցրահամ մրգերից պատրաստված չրերի ընտրանին:
Չնայած ներկայացված արտադրանքների մեջ գերակշռում էին ձեռքի աշխատանքները, սակայն պատանի ձեռներեցների կողմից փորձ էր արվել նաև օգտագործել տեխնոլոգիական հնարավորությունները:
Տոնավաճառի բարեհաջող ընթացքն ապահովելու գործում աշակերտներին մեծ աջակցություն էին ցուցաբերել HSBC բանկի կամավորները, որոնք ծրագրում ընդգրկվել են որպես բիզնես-խորհրդատուներ: Հենց տոնավաճառի սկզբից նրանք միացել են աշակերտական խմբերին և օգնել են ոչ միայն ձևավորել տաղավարները, այլ նաև մշակել ճիշտ մարկետինգային ռազմավարություն և սպառողներին պատշաճորեն ներկայացնել բիզնես –պլանը:
«Հայաստանի պատանեկան նվաճումներ» կազմակերպության կողմից իրականացվող «Ձեռնարկատիրական և քաղաքացիական կրթություն» ծրագիրը ֆինանսավորվում է JHM բարեգործական և HSBC բանկի կողմից: Ծրագրի նպատակը աշակերտներին կայուն և հարուստ տնտեսագիտական գիտելիքներ տալն է: Այն նպաստում է նաև աշակերտների ձեռնարկատիրական և գործարար հմտությունների զարգացմանը: Ծրագիրը հատուկ ուշադրութուն է դարձնում գործարարության գործնական ուսուցմանը:
Ծրագրի շրջանակներում աշակերտները հիմնում են գործարար ընկերություններ, կատարում շուկայական հետազոտություն, գրում բիզնես պլան, թողարկում և վաճառում ընկերության բաժնետոմսերը և կազմակերպում ապրանքի կամ ծառայության արտադրությունը:
Այդ ընթացքում նրանք ծանոթանում են նաև կորպորատիվ սոցիալական պատասխանատվության սկզբունքներին և դրանք կիրառում իրենց «մինի-գործարար» ձեռնարկներում: Ծրագրի շնորհիվ աշակերտները ձեռք են բերում թիմային աշխատանք կատարելու հմտություններ և դառնում առավել ինքնավստահ:
Տոնավաճառից գոյացած դրամական միջոցների մի մասը աշակերտները ձեռնարկատիրական և կորպորատիվ սոցիալական պատասխանատվության կրթական ծրագրի շրջանակներում ուղղելու են հանրային տարբեր ձեռնարկների իրականացմանը:
Մանրամասն տեղեկությունների համար կարող եք այցելել «Հայաստանի պատանեկան նվաճումներ» կազմակերպության վեբ կայք` www.jaarmenia.org:
