«Վալերի Պերմյակովին ՀՀ-ին փոխանցելու մասին» նախագիծը արտահերթ կարգով ԱԺ օրակարգ մտցնելու հարցը՝ այսօր ԱԺ-ում նախագիծը ներկայացրած «Ժառանգություն» խմբակցության պատգամավոր Զարուհի Փոստանջյանի և «Հանրապետական» խմբակցության պատգամավոր Սամվել Ֆարմանյանի միջև վեճի պատճառ դարձավ: Փոստանջյանն ընդգծեց, թե Սամվել Ֆարմանյանն իրեն անձնական վիրավորանքներ է հասցնում. ՀՀԿ պատգամավորը ներողություն խնդրեց, բայց ասաց՝ «Ժառանգության» պատգամավորը մասնագիտական առումով թերուս է: 

Փոստանջյանն էլ սաստեց իրեն ռեպլիկներ հղող եւ մի քանի կուսակցություն փոխող  երկու երիտասարդ պատգամավորներին` ասելով, որ իրեն ոչ ոք չի կարող կաշկանդել:

Վեճի պատճառն այն էր, որ ավելի վաղ Սամվել Ֆարմանյանը Զարուհի Փոստանջյանին բացատրել էր, որ ՀՀ գլխավոր դատախազն իր ռուս գործընկերոջը Վ. Պերմյակովի հարցով նամակով դիմել է պետության անունից: Մինչդեռ Փոստանջյանը քննադատեց ՀՀ գլխավոր դատախազ Գեւորգ  Կոստանյանին` ասելով, որ նա իր պարտականությունը պատշաճ չի կատարում` նկատի ունենալով  ՌԴ  դատախազին, Պերմյակովի գործով ուղղված նամակի  պատասխան չստանալը:

Սրան ի պատասխան Ֆարմանյանը նշեց. «Ի վերջո, բոլորը պետք է հասկանան Սամվել Ֆարմանյանի, Պողոս Պողոսյանի, Զարուհի Փոստանջյանի և Գևորգ Կոստանյանի տարբերությունը: Տարրական իրավաբանական գիտելիքներ են անհրաժեշտ հասկանալու, որ միջպետական պայմանագրերով կոնկետ ժամկետներ չեն նախատեսում գրություններին պատասխանելու համար: Տվյալ պարագայում ՀՀ գլխավոր դատախազը հանդես է գալիս ՀՀ անունից, իսկ դուք կամ մեր մյուս գործընկերները, որքան էլ ուզեք, չեք կարող հանդես գալ պետության անունից: Հերիք եղավ, ինչքան հանդուրժեցինք  անգրագիտությունը»,- զայրացավ ՀՀԿ պատգամավորը:

Երբ սկսվեց լեզվակռիվ երկու պատգամավորների միջեւ ԱԺ փոխնախագահը անջատեց ՀՀԿ պատգամավորի խոսափողը` ասելով, որ ԱԺ-ն  շուկա չէ:

Նշենք, որ Զարուհի Փոստանջյանը ԱԺ քննարկմանն է ներկայացրել բանաձևի նախագիծ, որում խորհրդարանին կոչ է անում ռուսական կողմից պահանջել և հայ իրավապահներին հանձնել Ավետիսյանների ընտանիքի 7 անդամների սպանության մեջ մեղադրվող Վալերի Պերմյակովին:

Հեղինակ՝ Անի Միրաքյան