Ինչպես բանաստեղծությունը, այնպես էլ լուսանկարչությունը հասկանալու համար ժամանակ է պետք: Լուսանկարն էլ պետք է ուշադիր նայես, բոլոր մասերը միացնես: Այս կարծիքին է լուսանկարիչ Գերման Ավագյանը, ով լուսանկարչությունն ու պոեզիան համադրելով «Նավավար»-ում ներկայացնում է յուրօրինակ մի ցուցահանդես՝ «Տեսողական պոեզիա» («Визуальная поэзия») անվանումով:
Լուսանկարիչն անկեղծանում է՝ այս մասին մտածել է 26 տարի առաջ.
«Դեռ 1989թ.- ից՝ «Գարուն» ամսագրում աշխատելու տարիներից եմ այս մասին մտածել: Երբ շփվեցի բանաստեղծների հետ, ցանկացա լուսանկարչությունն էլ հասցնել նրանց մակարդակին, սակայն ինչ-որ բան անընդհատ խանգարում էր. Լուսանկարչությունը երկրորդ պլան էր գնում:
Վերջերս իմ արխիվից Տիգրան Պասկևիչյանի լուսանկարը գտա, իրեն խնդրեցի, որ որպես հիշատակ հենց լուսանկարի վրա բանաստեղծություն գրի: Գնում-գալիս, նայում էի և, վերջապես, հասկացա, որ սա հենց այն ֆորմատն է, որ ես փնտրում էի երկար ժամանակ»:
Իսկ, թե ինչպե՞ս են ընտրվել նկարներին լրացնող տողերը, լուսանկարիչը պատմում է.
«Հերոսներն են ընտրել. Տարել եմ աշխատասենյակ ու ասել եմ՝ ինչ ուզում եք գրեք, ես գնացի: Միայն Մարինե Պետրոսյանն է տանը գրել, 2 հոգու համար էլ Վանաձոր եմ գնացել... »:
Հարցին, թե կա՞ մեկը, որին կցանկանար լուսնկարել ու խոսքը ներկայացնել, Գերման Ավագյանն ասաց.
«Իհարկե, կա.. .նկարել եմ, բայց, ցավոք, նա ողջ չէ..խոսքը գեղանկարիչ Վարուժան Վարդանյանի մասին է… »:
Լուսանկարչի խոսքով՝ իր հերոսները պատահական չեն ընտրվում ու տեսախցիկը ոչ բոլորին է ֆիքսում.
«Ով ինձ համար բանաստեղծություն է կարդացել, ում որ ճանաչել եմ, նրան էլ նկարել եմ: Եթե ես ծանոթ չեմ նրանց, ո՞նց նկարեմ»,-ասում է Գերման Ավագյանն ու մեջբերում Ավագ Եփրեմյանի խոսքը.«Մի՛ փնտրիր բանաստեղծությունը բառերի մեջ, բանաստեղծությունը մարդու մեջ է, իսկ մարդը՝ բառերի»:
Ինչ վերաբերում է լուսանկարչության և պոեզիայի համադրությանը, լուսանկարիչը նկատում է.
«Ընդհանուր շատ նմանություններ ունեն: Ինձ թվում է ՝պոետը գրելուց չգիտի, թե վերջում ինչ է ստացվելու, ֆոտոն էլ է այդպես.դու չգիտես, թե ինչ է ստացվել»:
Հավելենք, որ «Տեսողական պոեզիա» անվանումով այս յուրօրինակ ցուցահանդեսը շարունակվում է, ավարտի ժամանակն էլ հայտնի չէ.
«Երբ ասեն, որ նոր ցուցահանդես է լինելու, կավարտվի»,-ասում է լուսանկարիչը:
Նշենք, որ «Նավավար»-ը գտնվում է Արամի 42/1 հասցեում
Անի Կարապետյան
