«Ի տարբերություն Երևանի կենդանաբանական այգու, որի  վիճակը վերջերս նկատելիորեն լավ, ՀՀ մյուս շրջաններում ցավալի դրություն է: Մեծ մասամբ այգիները մասնավոր են և մարդիկ հիմնվելով չգրված օրենքների վրա՝ կենդանիներ են բերում, այգի հիմնում ու դարձնում զվարճանքի վայր, որտեղ կենդանիները լուրջ ճնշման են ենթարկվում: Մարդիկ չգիտեն, թե ինչ պայմաններում պետք է պահել, ինչպես վարվել կենդանիների հետ: Օրինակ` Գյումրիում  կենդանիները փոքր տարածքում են պահվում, չունեն համապատասխան պայմաններ:  Տեսանյութերից մեկում երևում էր, թե ինչպես էին ոռնում, քանդում, անգամ կերակուր չկար. սարսափելի իրավիճակ էր»,-այսօր՝ լրագրողների հետ հանդիպման ժամանակ ասաց «Փրկենք Գյումրու կենդանաբանական այգու կենդանիներին» նախաձեռնության ղեկավար Սիլվա Ադամյանը:

Նրա խոսքով՝  պետք է ունենալ  կենդանաբանական այգիներ, որոնց  պայմաններն ավելի լավ կլինեն: 

«Հայաստան չպետք է բերվեն այնպիսի կենդանիներ, որոնք բնորոշ չեն Հարավային Կովկասին»,-ասաց բանախոսը:

Նշենք, որ Գյումրիում 2010 թվականից գործող մինի կենդանաբանական այգին այլևս չի կարող գոյատևել: Խնդիրը ոչ միայն կերի հայթայթման հետ է կապված, այլ նաև ջրի ու ձմեռային սեզոնին հատուկ հարմարությունների բացակայության: Մտահոգ անձինք այս առիթով դիմելու են Բնապահպանության նախարարությանն ու ՀՀ վարչապետին: 

Անի Կարապետյան

Լուսանկարը՝ asparez.am-ի