«Մենք ասում ենք՝ այս ընտրությանը ժողովուրդը պետք է ասի հետևյալը՝ Ղարաբաղյան շարժումը շարունակվո՞ւմ է, թե՞ ոչ: Եթե որոշում է, որ շարունակում է, նշանակում է՝ պատերազմ, որովհետև Ղարաբաղյան շարժումը պատերազմ է, իսկ եթե որոշում է, որ խաղաղություն է, ուրեմն շարժումը չենք շարունակում»,- ԱԺ-Կառավարություն հարցուպատասխանի ժամին ասաց Նիկոլ Փաշինյանը՝ հավելելով, որ սա պարզ ընտրություն է:

«Ընդդիմադիր ճակատով հանդես եկող ուժերը հանդես էին գալիս խաղաղության վերանայման տրամաբանությամբ: Քոչարյան, Կարապետյան, Ծառուկյան. մեկն ասում է՝ վերաբանակցենք, մյուսը՝ ուժով պարտադրենք: Իրենք չեն համարում, որ էն խաղաղությունը, որը կա, էդ խաղաղությանը պետք է տեր կանգնել ու խնամել: Իրենք ասում են՝ էդ խաղաղությունը պետք է վերաբանակցել, ու դա բացում է էսկալացիայի ճանապարհը»,- ԱԺ-Կառավարություն հարցուպատասխանին, անդրադառնալով իր՝ «եթե ՔՊ-ն սահմանադրական մեծամասնություն չունենա, պատերազմ է լինելու» հայտարարությանը», ասել է Նիկոլ Փաշինյանը:

Անդրադառնալով ընդդիմության պնդումներին, թե խաղաղության համար երաշխավոր է պետք, Փաշինյանն ասաց. «Երաշխավորի մասին խոսակցությունն այն մասին է, որ այս խաղաղությունը մերը չի, մեկը թող գա, այս խաղաղությանը տեր կանգնի, ո՞վ կա, ո՞վ է ուզում խաղաղության տեր կանգնի։

Դրա համար է, որ մենք ասում ենք՝ ժողովուրդը պետք է տեր կանգնի խաղաղությանը, որովհետև խաղաղությունը մերն է, մեր ժողովուրդն է իր տառապանքների և զոհերի գնով այս խաղաղությանը հասել»։

***

ԱԺ-Կառավարություն հարցուպատասխանի ժամանակ վարչապետ Նիկոլ Փաշինյանն անդրադառնալով Ղարաբաղյան շարժմանը՝ ասաց. «Նույն Ղարաբաղի շարժման հետ կապված մենք չպե՞տք է ասենք, որ Հայաստանի և Ղարաբաղի էլիտան Ղարաբաղի ժողովրդին Ղարաբաղում պահել է պատանդի կարգավիճակում, այսինքն՝ մարդկանց պահել 30 տարի անորոշությունների մեջ. դուք հասկանո՞ւմ եք՝ դա ինչ է նշանակում՝ չստեղծելով նորմալ կրթական համակարգ: Ինչի իրենք Ղարաբաղին լո՞ւրջ են վերաբերվել, ո՛չ, լուրջ չեն վերաբերվել․․․ Այդ նույն մարդիկ Ղարաբաղի ժողովրդին պատանդի կարգավիճակով են պահել, այդ նույն մարդիկ, ում հավաքական անունը ասում եմ «փախածներ», «փա-խած-ներ»: Հիշո՞ւմ եք մի անգամ այստեղ ամբիոնից ինչ-որ գեներալների մասին էին խոսում, ասեցի՝ վախկոտ-դավաճանները: Այո, վախկոտ դավաճանները և փախած էլիտաները այս պատմության մեջ պետք է իրենց գնահատականին արժանանան՝ որպես Հայաստանի պետականությունը, Հայաստանի և Ղարաբաղի ժողովրդին պատանդ պահածներ»:

«Ուկրաինայի անվտանգության երաշխավորը գիտե՞ք ով է, Ռուսաստանն է։ Կիպրոսի անվտանգության երաշխավորության հարցում գիտե՞ք ով է դերակատարում ունեցել՝ Թուրքիան։

Մենք 2020 թվին ունեցել ենք անվտանգության երաշխավոր՝ ՀԱՊԿ–ն, և այդ կազմակերպությունն է մեզ առաջնորդել դեպի սպանդանոց։ Չեք հավատում, Բելառուսի նախագահ Լուկաշենկոյի հայտարարությունը լսեք Բաքվում արած իր` պաշտոնական, թե պետական այցի ընթացքում։

Հիմա քանի որ մենք դուրս ենք եկել դեպի կառափնարան տանող ճանապարհից, մեզ ասում են՝ ո՞նց, էս ո՞ւր եք գնում, մի րոպե»,– շարունակելով «խաղաղությանը երաշխավոր է պետք ընդդիմության պնդումներին իր արձագանքը, հայտարարեց Նիկոլ Փաշինյանը։

***

«Հայրենասիրության այն մոդելի հեղինակը, որով մենք ապրել ենք Խորհրդային Միությունում՝ Ստալինն է։ Դա ընդհանրապես որևէ կապ չունի մեզ հետ»,- այս

մասին Ազգային ժողով-Կառավարություն հարցուպատասխանի ժամանակ հայտարարեց վարչապետ Նիկոլ Փաշինյանը։

«Հայրենասիրության այն մոդելը, որով մենք, ես՝ ինքս մինչև վերջերս ապրում էինք, այդ հայրենասիրության մոդելը մեզ համար Խորհրդային Միության Կոմունիստական կուսակցությունն է ստեղծել և Իոսիֆ Ստալինը, և նա ասել է՝ հա՛յ ժողովուրդ, դուք պետք է այսպիսին լինեք։ Հիմա մենք վերադառնում ենք մեր ինքնությանը, որը կապվում է մեր ինքնության հետ։ Մենք հրաժարվում ենք Ստալինի սապոգի հայրենասիրության մոդելից: Սա մենք պետք է պարզ հասկանանք, սրա մասին է խոսքը: Մեր ինքնությունը մեր պետությունն է»,- ընդգծեց Փաշինյանը:

***

ԱԺ- Կառավարություն հարցուպատասխանի ժամանակ անդրադառնալով դիտարկմանը, որ փորձ է կատարվում ներկայացնել, թե խաղաղությունն ուրացումն է հայ ժողովրդի զոհողությունների՝ վարչապետ նիկոլ Փաշինյանը նշեց․ «Հայ ժողովուրդը (էլի գիտեմ՝ դժվար է ընկալվելու)՝ մենք գիտակցված զոհողության գնացել ենք 2020 թվականին: Դրա համար է, որ դրա արդյունքում ձեռք ենք բերել պետություն և անկախություն: Սրանից առաջ այդ բոլոր զոհողությունների հեղինակը մենք չենք եղել: Մեզ տարել են կառափնարան և զոհել են իրենց շահերին:

Առաջին անգամ է, որ մենք զոհողության ենք գնացել մեր շահերի համար, հասկանո՞ւմ եք, մեր պետության, մեր ինքնության համար, մեր ապագայի համար, և սա է ներվայինացնում բոլորին, որովհետև բոլորին ներվայնացնում է, թե դուք ո՞վ եք, որ որոշեք: Մենք պետություն ենք: Մենք ՀՀ-ն ենք, և մենք որոշել ենք: Ինչո՞ւ ենք որոշել, որովհետև ի տարբերություն ոմանց, ունեցել ենք մեր ժողովրդի տված լեգիտիմությունը: Այ դրա համար ենք որոշել: Մենք քվեատուփեր լցնելով չէ որ եկել, հասել ենք իշխանության, ոչ էլ այստեղից-այնտեղից «դաբրոներ» ունենալով ենք եկել հասել իշխանության:

2018թ․ հեղափոխությունը տեղի է ունեցել ի հեճուկս բոլորին, որովհետև բոլորին ձեռք էր տալիս ՀՀ-ն ունենալ հորթի կարգավիճակում, որի վզից, պարանը գցած, որտեղ ուզում, տանում են: Երաշխավորն էն է, որ պարանը գցել է հորթի վիզը և երաշխավորում է, որ ինքը նույնիսկ իրավունք չունի որոշել, թե երբ զոհողության գնա, որովհետև ինքը իրավունք չունի իր համար զոհողութան գնալ: Ինքը կարող է զոհողության գնալ միայն երաշխավորի համար, երբ երաշխավորն ասի՝ եկել է քո մորթվելու ժամանակը, գնա, մորթվի՛ր»։

***

«2018 թվականի հեղափոխությունը տեղի է ունեցել ի հեճուկս բոլորի, որովհետև բոլորին ձեռք էր տալիս ՀՀ-ն ունենալ հորթի կարգավիճակում, որի վզից պարանը գցած որտեղ ուզում, տանում են» այս մասին ԱԺ- Կառավարություն հարցուպատասխանի ժամանակ նշեց վարչապետ Նիկոլ Փաշինյանը՝ հավելելով, թե խոսակցություններ կային, որ Սորոսն է կազմակերպել հեղափոխությունը։

«Սորոսը ձեզ է կազմակերպել, էդ դուք եք, որ Սորոսի նման երաշխավոր եք փնտրում, որ հորթի նման գլուխներդ տանեք, մտցնեք պարանի մեջ, որովհետև կյանքում ինքնուրույն ոչ մի բան չեք արել։ Մի կոպեկ փող ինքնուրույն չեք աշխատել։ Էդ որ ասում են՝ հարուստ ենք, բան, «Ռենջ Ռովեր» ենք քշում, կյանքում մի կոպեկ փող ինքնուրույն աշխատած չկաք»,- նշեց Փաշինյանը։