Բուխարեստից ստացված ասեկոսեների համաձայն, Ռումինիայի ներքին գործերի նախարարությունը որոշում է կայացրել երկրից արտաքսել ոմն Բելլա Մուրադյանին, ում թեմի առաջնորդ Տաթև եպիսկոպոս Հակոբյանը համայնքին ներկայացրել է իբրև Ամենայն Հայոց կաթողիկոսի ներկայացուցիչը ռումինահայ համայնքում:
Այս մասին Asekose.am-ը նամակ է ստացել, որի հեղինակը, նշելով, թե բարետես արտաքինով տիկինը, որին Տաթև եպիսկոպոս Հակոբյանը առաջնորդարանում աշխատանք էր տվել, 2012 թվականին է մուտք գործել Ռումինիա՝ ունենալով միայն կեցության թուղթ։
Ըստ Տաթև Հակոբյանի բացատրության, որ նա տվել է թեմական խորհուրդին, տիկին Բելլան կամավորական աշխատանք պետք է կատարեր` ի նպաստ Ռումինիայի հայ առաքելական եկեղեցու թեմի։
Սակայն ռումինահայերը բողոքում են, որ իրենք ոչ միայն տեղյակ չէին գեղեցիկ տիկնոջ կամավորական աշխատանքներից, այլև զարմացած լուրից, որ թեմի առաջնորդ Տաթև Հակոբյանը դիմել էր Ռումինիայի կրոնի նախարարին` փոխանցելով Վեհափառի կամքը ու եպիսկոպոսական իր հայրական խնդրանքն, ըստ որի Բելլա Մուրադյանը պետք է լինի առաջնորդարանի ու Վեհափառ հոր ներկայացուցիչը Ռումինիայի թեմից ներս և աշխատավարձ ստանա, ինչը սահմանաված է կառավարության որոշմամբ:
Ռումինահայերը նաև տարակուսած նշում էին, թե ինչպես այդ գործի համար առաջադրվեց գեղատեսիլ տիկինը, որ, ըստ նրանց, ոչ հայերեն գրել գիտի, ոչ էլ ռումիներեն...
Եվ ահա, ըստ Բուխարեստից ստացված վերջին տեղեկությունների, կառավարությունը չի հասկանում Ռումինիայի հայոց եկեղեցական թեմի ցավերը, և ցանկանում է արտաքսել տիկին Բելլային։
Փաստորեն, Ռումինիայի հայ համայնքում սկանդալ է հասունանում, որի վերաբերյալ մեր եկեղեցու թեմը, ոչ միայն տեղյակ լինելով, լռում է, այլ նաև դրա անմիջական մասնակիցն է եղել:
Asekose.am-ը պատրաստ է խնդրի վերաբերյալ հրապարակել նաև ՀԱԵ-ի Ռումինիայի թեմի պարզաբանումը, իսկ մինչ այդ ներկայացնում ենք Բուխարեստից ստացված ձայնագրություն, որտեղ Տաթև եպիսկոպոս Հակոբյանը տիկին Բելլային ներկայացնում է իբրև Վեհափառի ներկայացուցիչ։
