«ՊՈԱԿ-ները կա՛մ կրճատում ենք, կա՛մ հրաժարվում ենք, բոլոր այդ ավելորդ ատրիբուտիկայից հրաժարվում ենք»,- այսօր կարգադրել է վարչապետը:
ՊՈԱԿ-ները միշտ համարվել են կառավարական տարբեր կառույցներին տաքացնողներն և հակառակը՝ դրանց ղեկավարները թուխս են նստել ՊՈԱԿ-ների բյուջեի վրա, սակայն դրանից ոչինչ չի ծնվել, փոխարենը՝ կասկածելի պակասել է...
Այս լուրը ինձ հիշեցրեց հին մի անեկդոտ.
«Մեկի թութակը «պլանքյաշ» է լինում, ոստիկանները մի օր տիրոջը բռնում, տուգանում են: Սա գալիս ասում է թութակին. «Մի հատ էլ ծխել ես, բմբուլներդ քամուն եմ տալու»: Հաջորդ օրը գալիս է տուն, տեսնում է ողջ տունը ծուխ, թութակն էլ ինքն իրան «փիդրում» է ու երգում. «Ինձ բմբուլ պետք չի՜, ինձ բմբուլ պետք չի՜»:
Այնպես որ՝ ավելորդ ատրիբուտիակայից հրաժարվողներին պետք է զգուշացնել, որ հանկարծ «չփիդրեն» իրենց բմբուլները...դա արդարացում չի լինելու...
Ու միթե միայն ՊՈԱԿ-ներում է ատրիբուտիկան շատ, քանի փոխնախարարներ կան, որոնք պակաս ատրիբուտիկա չեն, քանի խորհրդականներ կան կառավարությունում, որ բառիս բուն իմաստով ատրիբուտիկա են...
Այնպես որ՝ ինչպես ատրիբուտիկաների վերջը չի երևում, այնպես էլ գործերի...
Հիշեցնեմ, որ այսօր կառավարության նիստի վերջում վարչապետ Կարեն Կարապետյանը շատ խիստ հանձնարարական է տվեց` իրականացնել կտրուկ փոփոխություններ: ««Օպտիմալացում» բառը փոխարինել` «կտրուկ կրճատման», ՊՈԱԿ-ներին` բալաստից ազատման, այն ՊՈԱԿ-ները, որ վարչական հանձնարարությունը չեն կատարում, լուծարման: Պարզեցնել կառավարումը, ավելորդ կառույցներից` ԾԻԳ-երից հրաժարվում ենք, ՊՈԱԿ-ները կա՛մ կրճատում ենք, կա՛մ հրաժարվում ենք, բոլոր այդ ավելորդ ատրիբուտիկայից հրաժարվում ենք»:
Ա.Գրիգորյան
