Asekose.am-ը 2 օր առաջ հրապարակել էր «Պահանջում են Զանգեզուրի պղնձամոլիբդենային կոմբինատում անցկացված հասարակական լսումներն անվավեր ճանաչել» վերտառությամբ հոդվածը, որում, ըստ «Զանգեզուրի պղնձամոլիբդենային կոմբինատի» ներկայացրած պարզաբանման, իրենց գործունեության վերաբերյալ տեղ են գտել իրականությանը չհամապատասխանող ձևակերպումներ:«Զանգեզուրի պղնձամոլիբդենային կոմբինատ»-ից նշում են, որ հիշատակված հրապարակումը տարածվել է «Էկոլուր» տեղեկատվական ՀԿ կողմից, և սա առաջին դեպքը չէ, երբ այդ կազմակերպության ղեկավար Ինգա Զառաֆյանը կողմնակալ, չստուգված, մտացածին, անձնական էմոցիոնալ ընկալումների վրա հիմնված տեղեկություններ է տարածում իրենց ընկերության մասին, ինչը արատավորում է ԶՊՄԿ-ի գործարար համբավը:
Պարզաբանման ամբողջական տեքստը կարող եք կարդալ այս հասցեով:
««Էկոլուր» ՀԿ ղեկավար, ինչպես պարզվեց՝ համատեղությամբ նաև ՀՀ Գիտությունների ազգային ակադեմիայի տեղեկատվական - վերլուծական կենտրոնի ղեկավար Ինգա Զառաֆյանի՝ ԶՊՄԿ վրա սևեռված հետաքրքրությունը, մեր ընկալմամբ և Ի. Զառաֆյանի հետ անձնական շփումների արդյունքում ստեղծված տպավորությամբ, անառողջ և պրովոկատիվ կողմնակալ մոտեցումների տիրույթում է, ինչը լրացուցիչ մտորումների տեղիք է տալիս:
Մենք, բարձր արժեվորելով խոսքի ազատության իրավունքը, այս փուլում, այնուամենայնիվ, արդեն ստիպված ենք լինելու դիմել մեր ընկերության հեղինակության պաշտպանությանը՝ համաչափ և ողջամիտ միջոցներով, քանի որ տիկին Զառաֆյանի կողմից հատուկ մեր դեմ նախաձեռնված գործողությունները կարող են բացասաբար անդրադառնալ ԶՊՄԿ կողմից իրականացվող ծրագրերի արդյունավետության վրա»,-նշված է ԶՊՄԿ-ի նամակում, իսկ պարզաբանման վերջում ափսոսանք է հայտնվում, որ հիշատակված հայտարարության հեղինակները շեղվել են հանրային լսումների բուն էությունից և ընդամենը փորձել են վարկաբեկել իրականացված գործընթացները, ինչը ակնհայտ պատվերի տպավորություն է թողնում:
Լուսանկարը՝ ՖոտոԼուրի
