Asekose.am-ը բաց նամակ է ստացել Գեղարքունիքի մարզի դպրոցներից մեկը ներկայացնող  մի խումբ ուսուցիչներից, ովքեր ահազանգում են  իրենց կրթական հաստատությունում գոյություն ունեցող արատավոր երևույթների մասին:

Խոսքը՝ տնօրենի կողմից ուսուցիչներին աշխատանքի ընդունելու «սակագներ»-ին է վերաբերում:

Հարկ է նշել, որ առաջին դեպքը չէ, երբ մեր ընթերցողները բողոքում են, որ այս կամ այն դպրոցում աշխատանքի անցնելու համար պետք է վճարել «ըստ սահմանված գնացուցակի»:

Նույնը վերաբերում է նաև տնօրեններին, ովքեր ըստ խոսակցությունների,  երբեք «հենց այնպես չեն ընտրվում»:

Հենց այս պատճառով՝ մենք չենք հրապարակում ոչ բաց նամակը, որի հիմնական հասցեատերը Գեղարքունիքի մարզպետն է, ոչ էլ տնօրենի անունը:

Սակայն ցանկանում ենք ընդգծել, որ Asekose.am-ը կապ է հաստատել  այդ տնօրենի հետ. նա  նշել է, որ նամակում  բերված փաստերը հիմնազուրկ են և իր դեմ իրականացված կեղտոտ քայլ. «Այդ ամենը որևէ մեկի արած կեղտոտ գործն է: Բավական է, թողեք հանգիստ աշխատենք»,-ասել է տնօրենը: 

Համաձայն ենք, որ դպրոցն ու տնօրենը պետք է կարողանան հանգիստ աշխատել, սակայն ցանկանում ենք ընդգծել, որ դրա համար համապատասխան մթնոլորտ պետք է ստեղծեն և նույն դպրոցի տնօրինությունն ու անձնակազմը, և ՝ պատկան մարմինները՝ ստուգելով նմանատիպ լուրերը, բացառալով նման արատավոր երևույթներն ու դեմն առնելով նաև այս մասին կասկածելի խոսակցություններին:  

ԿԳ նախարարությունն ավելի  լավ պետք է իմանա դպրոցի խնդիրների մասին ու ոչ թե մամուլից, այլ առաջին ձեռքից  իմանա դրանց վերաբերյալ,  հրատապ լուծում տա, որպեսզի բացառվեն արատավոր երևույթներն, ինչպես նաև այդ արատավոր երևույթներին ակամայից մասնակից լինելն ու հետո բաց նամակներով հաշիվներ մաքրելը: 

Ի դեպ, հետաքրքրական է, որ դպրոցի տնօրենի կողմից մեզ ներկայացված հերքում-նամակում ու բաց նամակում ուսուցիչների անուն-ազգանուններ կան, որոնք կրկնվում էին...

Նշենք նաև, որ խնդրի վերաբերյալ Asekose.am-ը զրուցել է  նաև ԿԳՆ մամլո խոսնակ Լուսինե Մարգարյանի հետ, ով նշել է, որ իրենք տվյալ հարցին կարող են անդրադառնալ միայն փաստերին ծանոթանալուց հետո, առավել ևս, որ տվյալ նամակն ուսուցիչներն ուղղել էին Գեղարքունիքի մարզպետ Ռաֆիկ Գրիգորյանին, այլ ոչ թե իրենց:

Հավելենք, որ մարզպետը մեր զանգերին չէր պատասխանում, իսկ փոխմարզպետ Անդրանիկ Հակոբյանն էլ մեզ տեղեկացրեց, որ իրենք դեռ նման բովանդակությամբ նամակ չեն ստացել. «Եթե ստացած լինեինք, ես տեղեկացած կլինեի, որովհետև կրթությանը վերաբերող հարցերը համակարգում եմ ես»:

Եվ վերջում՝  կրկնվում ենք, խնդրի ու վերը նշված արատավոր երևույթների վերաբերյալ խոսակցությունները բնորոշ են  տարբեր մարզերին  ու նաև ՝ Երևանին: Այս մասին խոսում են տարբեր հարթակներում ու հազարից մեկ՝ նաև բաց նամակներում..Սակայն միթե փաստ է պետք՝ խնդրին վերջնական լուծում տալու համար, քանի որ նույնիսկ դասագրքերում է գրված՝ ծուխն առանց կրակ չի լինում...

Եվ երանի նրան, ով  կհավատա ու խնդրին լուծում կտա՝ առանց կոնկրետ կաշառատուին ու կաշառակերին բռնելու...

Նրան էլ կհավատան ոչ միայն ուսուցիչներն, աշակերտներն ու նրանց ծնողներն, այլև հասարակության լայն շերտերը և նույնիսկ նրանք, ովքեր, բարեբախտաբար կամ դժբախտաբար , արդեն կապ չունեն դպրոցի հետ... 

Հեղինակ`

Աննա Հարությունյան