Մարտի 17-ին, Ուսանողական խորհրդի նախաձեռնությամբ ՀՊՏՀ-ում հյուրընկալվել էին Հայաստանի ազատագրության հայ գաղտնի բանակի՝ «ԱՍԱԼԱ»-ի մարտիկներ Վազգեն Սիսիլյանը և Հակոբ Ջուլֆայանը: Այս հանդիսավոր միջոցառմամբ տրվեց ՀՊՏՀ Ուսանողական խորհրդի կողմից կազմակերպվող Հայոց ցեղասպանության 100-ամյա տարելիցին նվիրված միջոցառումների շարքի մեկնարկը:
Նախքան միջոցառման մեկնարկը ՀՊՏՀ ռեկտոր Կորյուն Աթոյանը և Ուսանողական խորհրդի նախագահ Սերգեյ Խառատյանը հյուրերին ուղեկցեցին ՀՊՏՀ զոհված ուսանող-ազատամարտիկների անվան լսարան, որտեղ Սերգեյ Խառատյանը ներկայացրեց մի քանի ուշագրավ փաստեր ուսանող-ազատամարտիկների, լսարանի ստեղծման և «Նժդեհ» ռազնահայրենասիրական ակումբի գործունեության մասին: Մարտիկները իրենց ստորագրությունները թողեցին գաղտնի բանակի դրոշի վրա, որը նվիրեցին ՀՊՏՀ Ուսանողական խորհրդին:
Այնուհետև ՀՊՏՀ Մեծ հանդիսասրահում մեկնարկեց հանդիսավոր միջոցառումը: Նախ ցուցադրվեց ֆիլմ, որը պատմում էր «ԱՍԱԼԱ»-ի ստեղծման, գործունեության և առաքելության մասին, որի ավարտին բուռն ծափերի և ձեռքի մատների «հաղթանակ» խորհրդանիշի ուղեկցությամբ դահլիճ մտան գաղտնի բանակի անդամները:
Միջոցառման սկզբում հյուրերին ողջունեց ռեկտոր Կորյուն Աթոյանը: Այնուհետև ողջույնի խոսք ասաց Ուսանողական խորհրդի նախագահ Սերգեյ Խառատյանը, ով նշեց, որ ուսանողական խորհրդի կազմում ստեղծվել է ժամանակավոր հանձնաժողով, որը զբաղվելու է Հայոց ցեղասպանության 100-ամյա տարելիցին նվիրված միջոցառումների կազմակերպմամբ: Ս. Խառատյանը նաև խորհրդանշական հուշանվեր հանձնեց մարտիկներին:
Միջոցառման ընթացքում նախ ելույթ ունեցավ «Վան» գործողության հրամանատար Վազգեն Սիսիլյանը: Վերջինս առավել հանգամանալից պատմեց «ԱՍԱԼԱ»-ի կազմավորման և գործունեության մասին ուշագրավ պատմություններ, ներկայացրեց պատմական փաստեր: Վազգեն Սիսիլյանը առանձնացրեց ու կարևորեց Հայկական հարցի միջազգայնացումը և պայքարի կոչ արեց երիտասարդներին. «Մեր առանձնահատկությունը հայ լինելու մեջ է: Հայ ենք, ուրեմն` պետք է պայքարենք»:
Միջոցառման ավարտին ուսանողները հնարավորություն ստացան հյուրերին ուղղել իրենց հարցերը և ստանալ դրանց պատասխանները անմիջապես «ԱՍԱԼԱ»-ի մարտիկներից:
