ТАСС-ը գրում է, որ Լոս Անջելեսի ոստիկանությունը բնակելի տներից մեկում հայտնաբերել է զինանոց, որտեղ եղել է 1200 միավոր հրազեն և 2 տոննա ռազմամթերք:
Զինանոցը եղել է Խաղաղ օվկիանոս դուրս եկող մոդայիկ թաղամասում: Տան խուզարկությունն անցկացվել է սեփականատիրոջ տարօրինակ մահվան պատճառով, ով մահացել էր փողոցում՝ իր տնից մի քանի տասնյակ մետր հեռավորության վրա:
Զինանոցը հայտնաբերվել է անցած շաբաթ, սակայն իշխանություններն այդ մասին ԶԼՄ-ներին հայտնել են միայն հիմա: «Մենք ապշել էինք տեսնելով զենքի քանակը»,- հայտարարել է ոստիկանության ներկայացուցիչ Էնդրյու Սմիթը: Զինանոցում եղել են արագագործ ատրճանակներ, կիսաավտոմատ հրացաններ, կարաբիններ»: Նրա խոսքերով՝ մի քանի բեռնատար է պահանջվել տանը և ավտոտնակում եղած ռազմամթերքը տեղափոխելու համար:Ոստիկանությունը փորձում է պարզել՝ ինչ պատճառով է տղամարդն այդքան զենք պահել: Առայժմ ոչ մի ապացույց չկա, որ նա ներգրավված է եղել հանցավոր գործունեության մեջ կամ զբաղվել է զենքի մաքսանենգությամբ: Ոստիկանության աշխատակիցները նշել են, որ այդքան զենքի պահպանումը հանցագործություն չէ այն դեպքում, եթե այն օրինական կերպով է ձեռք բերվել:
Ներկայում Լոս Անջելեսի ոստիկանությունն ուսումնասիրում է զենքի ծագումը՝ պարզելու, թե այն որևէ հանցագործության մեջ օգտագործվե՞լ է:
