«Վերջին օրերին խուլիգանախմբի զանազան ներկայացուցիչներ ակտիվացել են, ինքնաերևակայված, ինքնափետուրավորված շատ գործիչներ, որոնք ուղղակիորեն պատճառն են մեր կյանքի աղետի, ողբերգության»,- այս մասին ֆեյսբուքյան եթերում ասել է «Սրբազան պայքար» շարժման առաջնորդ Բագրատ Սրբազանը։ «Ինչպես սաղմոսերգուն ասում է՝ ամբարիշտը կկորչի ու նրա փոշին անգամ չեք գտնի, ու այդպես էլ լինելու է»,- նշել է նա՝ հավելելով, որ տգետների համար սրբազան պատգամն այդպիսին է։

***

Ֆեյսբուքյան եթերում անդրադառնալով օրեր առաջ ԱԺ-ում, լրագրողների հետ զրույցում, ՔՊ-ական Վահագն Ալեքսանյանի հայտարարությանը, Բագրատ Սրբազանն ասել է․ «Ըստ նրա՝ ԱԱԾ-ն իմ մասին ասել է՝ չի տիրապետում տեղեկությանը՝ արդյոք ես ԿԳԲ-ի գործակալ եմ, թե ոչ՝ ակնարկելով, որ ես ռուսական ԿԳԲ-ի գործակալ եմ։ Բոլորդ շատ լավ գիտեք, որ ԱԱԾ-ն, դատախազությունը նշել են, որ ստուգման արդյունքում պարզել ենք, որ նման տվյալներ գոյություն չունեն, այսինքն՝ ԱԱԾ-ն ու դատախազությունը հերքել են այդ լուրը։ Այսինքն՝ այդ մարդը կասկածի տակ է դնում այդ կառույցների կոմպետենտությունը, նրանց արհեստավարժ լինելը»։ Սրբազանը դիմել է ԱԱԾ-ին ու դատախազությանը՝ կոչ անելով վերաբերմունք հայտնել Ալեքսանյանի արտահայտությանը։

Անդրադառնալով Ջահերով երթի ժամանակ Թուրքիայի ու Ադրբեջանի դրոշներն այրելուն՝ Բագրատ Սրբազանն ասել է․ «Լավ են արել ու ճիշտ են արել․ քանի դեռ գտնվում ենք այս վիճակում, դա՛ է լինելու այդ դրոշների ճակատագիրը և դա լինելու է մեր պայքարի ճանապարհը։ Ում հարազատ չէ սա, նա ուրացող է ու դավաճանների հետ բաժին ունի»։