«Հպարտ դեմքով ասում եք Արցախի Հանրապետություն, կա՞ր Արցախի հանրապետություն»,- ԱԺ-ում ընդդիմադիր պատգամավոր Արթուր Խաչատրյանի՝ խաղաղության պայմանագրի վերաբերյալ հարցին պատասխանելու ժամանակ ասաց ԱԳ նախարար Արարատ Միրզոյանը․ «Դուք որ իշխանություն էիք, կա՞ր ճանաչված Արցախի Հանրապետություն։ Պատասխանն ակնհայտ է՝ ոչ։ Հալվա, հալվա ասելով՝ բերանը չի քաղցրանում։ Էն որ շուտ-շուտ ասում եք Արցախի Հանրապետություն, ճանաչեիք, հետո էլ կասեիք»,- ասաց Միրզոյանը՝ մեղադրելով նախկին իշխանություններին՝ ստատուս քվոն անսահման ձգելու մեջ։ «Լավ էլ իմացել եք, որ դա մի օր պայթելու է հայ ժողովրդի գլխին։ Ուղղակի հայ ժողովուրդը, և ես՝ անձնապես, չենք ունեցել խելք, բավարար քաղաքական հասունություն՝ ժամանակին գլխի ընկնել, ճիշտ կողմնորոշվել ու գնալ զիջումների, լուծումների»,- ասաց Միրզոյանը։

***

«Քանի դեռ վերջնական չենք հանգել խաղաղության, չենք ստորագրել ու ձեռքսեղմում չի եղել, էսկալացիայի վտանգը կա»,- ԱԺ-ում ասաց ԱԳ նախարար Արարատ Միրզոյանը՝ հավելելով․ «Ինչու են կրակում, չեմ կարող ասել, բայց Հայաստանի դիրքորոշումը մեկն է՝ ստեղծենք միասնական, համատեղ հետաքննող մեխանիզմ»,- ասաց Միրզոյանը՝ նշելով, որ այդկերպ հնարավոր կլինի պարզել՝ հրամա՞ն են կատարում այդ զինվորները, թե ինքնուրույն գործողություն են արել։

Դիտեք նաև՝

«Մենք շատ լուրջ և շատ իրատեսական հնարավորություն ունենք դրական հանգուցալուծման հասցնել Հայաստան-Թուրքիա երկխոսությունը, ինչպես նաև Հայաստան-Ադրբեջան հարաբերությունների կարգավորումը»,- այսօր ԱԺ-ում ասաց ՀՀ ԱԳ նախարար Արարատ Միրզոյանը՝ հավելելով, որ հավատում է այդ հարաբերությունների մոտալուտ կարգավորմանը։
Նա նաև նշել էր, որ չունենալով դիվանագիտական հարաբերություններ Թուրքիայի հետ՝ Հայաստանն ունի շատ ավելի ակտիվ ու գործոն երկխոսություն, քան բազմաթիվ երկրներ, որոնք ունեն իրար հետ դիվանագիտական հարաբերություններ։

«Փորձում ենք անել այնպես, որ թղթով սահմանված ամբողջ ծավալով պարտավորություններն իրար նկատմամբ իրականացվեն, այսինքն՝ ունեցած պայմանագրի լիարժեք իրականացմանն ենք ձգտում»,- այսօր ԱԺ-ում ասաց ԱԳ նախարար Արարատ Միրզոյանը՝ անդրադառնալով ՀՀ-ՌԴ հարաբերություններին։ «Հայաստանի և Ռուսաստանի միջև առողջ գործընկերային հարաբերություններ են»,- ասաց Միրզոյանը՝ նշելով, սակայն, որ կան խնդիրներ, կան էական հարցեր, որոնց շուրջ ռուսաստանցի գործընկերներն իրենց դիրքորոշումն ու իրադարձությունների նկատմամբ ընկալումն ունեն։

***

ՀՀ ԱԳ նախարար Արարատ Միրզոյանն, ի պատասխան ընդդիմադիր պատգամավոր Գառնիկ Դանիելային հարցի, անդրադարձավ կոնյակագործների խնդրին։ Նա հայտնեց, որ ՀՀ-ի և Վրաստանի համապատասխան գերատեսչությունների միջև քննարկումներ են ընթանում։ «Ամեն ինչ այդքան միանշանակ չէ, կան խնդիրներ, որոնք կարող են տպավորություն թողնել, որ արհեստականորեն են ստեղծվում, խնդիրներ էլ կան, որոնք, այնուամենայնիվ, առնվազն շանս ունեն կամ արժանի են համարվելու հիմնավոր»,- նշեց նա՝ հավելելով, որ այսօր կամ վաղը որոշակի շարժ կլինի այս հարցով։ «Բայց խնդիրն ամբողջությամբ այսօր կամ վաղը չի լուծվի»,- նշեց նա։

Հիշեցնենք՝ կոնյակագործները Վրաստանի տարածքով իրենց արտադրանքը Ռուսաստան և Բալթյան երկրներ արտահանման հարցում խոչընդոտների են հանդիպում։ Ապրանքի կապարակնիքները պոկվում են, ուղարկվում լաբորատոր ստուգման։

«Գերիների և ապօրինի պահվող անձանց և ընդհանրապես, հումանիտար հարցերը մեծ օրակարգի կարևոր մաս են, ցավոտ մաս են, երևի այն եզակի հարցերից են, որտեղ ընդհանրապես կառուցողական խոսակցություն չի ստացվում ունենալ»,- լրագրողների հետ զրույցում ասաց ՀՀ ԱԳ նախարար Արարատ Միրզոյանը։
«Մենք կարծում ենք, որ եթե մեզ հաջողվի վերջնական, ստորագրված խաղաղություն, մի հայտարարի կգանք ենթակառուցվածքների ապաշրջափակման գործընթացում, և ընդհանրապես, կլինեն իրական կարգավորումներ, առաջ կգնան մեր հարաբերությունները, վստահ ենք, որ, եթե մինչ այդ հարցերը չստացվի լուծել, գոնե այդ պահին բարենպաստ միջավայր կլինի, այդ հարցերը լուծելու համար»․- ասաց Միրզոյանը։