***

Վարչապետ Նիկոլ Փաշինյանը ֆեյսբուքյան իր էջում կարճ տեսանյութ է հրապարակել հունիսի 2-ին ԵՊՀ-ում տեղի ունեցած հանդիպումից, որտեղ միջազգային հարաբերությունների ֆակուլտետի 3-րդ կուրսի ուսանող Հովհաննես Շամրիկյանը նրան սուր հարցեր է ուղղում՝ մասնավորապես շեշտելով, որ համաձայն չէ ո՛չ Արցախի, ո՛չ էլ «իրական Հայաստան»-ի վերաբերյալ Փաշինյանի մտքերի հետ։
Մենք հրապարակել էինք Հովհաննես Շամրիկյանի գրառումը, որտեղ նա մանրամասն ներկայացրել էր թե՛ Փաշինյանին ուղղված հարցերը, թե՛ նրա պատասխանները։
Ուսանողի հարցերից մեկը հետևյալն էր․ «Եթե վերադառնայիք 2018թ. և իմանայիք, որ հեղափոխության արդյունքը լինելու է Արցախի կորուստը, Ձեր թույլ լեգիտիմությունը, դաշնակիցների հետ հարաբերությունների փլուզումը, հակասությունները եկեղեցու հետ, նորից ձեռնամուխ կլինեի՞ք հեղափոխությանը»։ Փաշինյանն այս հարցին պատասխանելով՝ մասնավորապես ասել էր․ «2020 թվականից հետո, ավելի ճիշտ սեպտեմբերի 27-ից հետո, ավելի շատ նոյեմբերի 9-ից հետո, ես ամեն օր վերադարձել եմ 2018 թվական․․․ 44-օրյայի արդյունքում մենք կորցրեցինք մեր հայրենիքից մի մաս, բայց ձեռք բերեցինք պետություն»։ Փաշինյանը հավելել էր նաև՝ 2018 թվականի նրա կարևորագույն թեզերից է եղել Հայաստանը դուրս դնել պատմական ցիկլերից և որ հիմա մենք ստացել ենք հարատև պետություն ունենալու հնարավորություն։