Փաստաբան Սոս Հակոբյանի ֆեյսբուքյան գրառումը․ «Ոստիկանությունը վախենում է ձերբակալել անգամ քպ էլ չէ, քպ քույր կուսակցության թաղապետին, որն ուղիղ եթերով մի 10 հոգու հետ վարչական շրջանի շենքում Արթուր Չախոյանին էր ծեծում։
Դուք ոստիկանություն չեք. ՔՊ պահնորդ, իշխանության կազմակերպված զինված խումբ, ինչ կուզեք, բայց ոչ ոստիկանություն։
Մարդուն կծեծեն ինքն էլ կգնա կնստի, սայա ձեր դեմքն ու արժեքները։
Մարդու իրավունքների պաշտպանն էլ կարա վառի իր վկայականը, կարդացած գրքերը և գնա անժամկետ արձակուրդ։
Դուք պիտանի պաշտպան չեք, չէ սխալ ասեցի. դուք պարզապես պաշտպան չեք»։

Դիտեք նաև՝

Այսօր Նոր Նորքի թաղապետարանում վարչական շրջանի ղեկավար Տիգրան Տեր-Մարգարյանի, նրա աշխատակիցների և ակտիվիստ Արթուր Չախոյանի միջև ծեծկռտուքից հետո 6 անձ ձերբակալվել է։ Այս մասին Factor-ի հարցին ի պատասխան հայտնել են Ներքին գործերի նախարարությունից. «Ձերբակալված անձանց մասով նյութերն ուղարկվել են նախաքննական մարմնին»,- նշել է ՆԳՆ հասարակայնության հետ կապի և լրատվության վարչության պետ Զարզանդ Գաբրիելյանը։ Արդյո՞ք Տեր-Մարգարյանը ձերբակալվածների թվում է` գերատեսչությունը չի մանրամասնել։

***

Բլոգեր Արթուր Չախոյանի փաստաբան Վահե Եփրիկյանը «Մեդիահաբ»-ի հետ հեռախոսազրույցում հայտնել է, որ Չախոյանը հիվանդանոցում բուժզննում է անցնում․ «Նրա վնասվածքներն անզեն աչքով էլ տեսանելի են՝ այտուցներ, սալջարդ։ Նա ձերբակալվածի կարգավիճակ ունի՝ խուլիգանության հանցակազմով»,- ասել է Եփրիկյանը՝ նշելով, որ ձերբակլվել են նաև ծեծկռտուքի այլ մասնակիցներ․ «Թաղապետին չեն ձերբակալել, թեև խուլիգանություն կատարող կենտրոնական անձանցից մեկը նա էր, վնասվածք պատճառողն ինքն էր»,- նշել է փաստաբանը՝ հավելելով, որ հիվանդանոցից դուրս գրվելուց հետո Չախոյանին կտանեն քննչական բաժին։
Բժիշկը հայտնել է, որ առաջարկվել է հիվանդանոցային հսկողություն և բուժում։ «Եթե ցանկություն հայտնի՝ կհոսպիտալացվի»,- ասել է նա՝ նշելով, որ Չախոյանը դեռ չի որոշել՝ մնում է հիվանդանոցում, թե ոչ։

***

ՀՀ նախկին ՄԻՊ Արման Թաթոյանի գրառումը. «Երևանի Նոր Նորքի վարչական շրջանի ղեկավարի ու մյուս պաշտոնյաների վարքը, խմբով մարդուն լկտիաբար ծեծելն ուղղակի խուժանություն է, անարգանք պետության ու պետականության նկատմամբ:
Սա քաղաքական բարձրագույն հովանավորության արդյունք է, որը պետական համակարգ է տեղափոխել քրեական բարքեր:
ՔՊ վերնախավը պաշտոնների է նշանակում մարդկանց, ովքեր իրենց քննադատողների հետ մտնում են «քրեական ռազբորկաների» մեջ և խեղում պետականության արժեքը: Դեռ մի հատ էլ խմբով արդարացնում են տեղի ունեցածը`ինչ-որ քաղաքական հարցերի հղում անելով` այդ կերպ ապացուցելով, որ նեղ քաղաքական ու անձնական շահերը բարձր են պետությունից: Սա դարձել է մեր պետականության գլխավոր սպառնալիքներից:
Պաշտոնյաները պարտավոր են հանդուրժել խիստ, ցնցող քննադատությունը ու նման արձագանքի որևէ իրավունք չունեն: Առավել լկտիություն է նման արձագանքը լրագրողական տեսախցիկների առաջ և ուղիղ եթերում` գիտակցելով, որ իրենց դիտում է հանրությունը:
Արթուր Չախոյանի նկատմամբ նման վարքագիծ ցուցաբերած պաշտոնյաներին քրեական հետապնդման և հետագայում նրանց քրեական պատասխանատվության չենթարկելը կնշանակի տեղի ունեցածի արդարացում, իշխանական շարունակական հովանավորություն»:

«Արթուր Չախոյանը բուժզննում անցնելուց հետո, բժշկի հորդորով, կհոսպիտալացվի»,- լրագրողների հետ զրույցում ասաց Չախոյանի փաստաբան Վահե Եփրիկյանը։ «Ճիշտ է՝ կյանքի համար ռեալ վտանգ չկա, սակայն հոսպիտալացումը պարտադիր է, խորհուրդ չեն տվել անգամ քայլել։ Նա մի քանի օր կմնա այստեղ՝ «Սուրբ Գրիգոր Լուսավորիչ» ԲԿ-ում»,- ասաց Եփրիկյանը՝ հավելելով, որ հիվանդասենյակը կվերահսկվի ոստիկանների կողմից, քանի որ Չախոյանը ձերբակալված է։
Նա զարմանք հայտնեց, որ մինչև այս պահը Նոր Նորքի թաղապետ Տիգրան Տեր-Մարգարյանը ձերբակալված չէ․ «Անհասկանալի է՝ ի՞նչ տրամաբանությամբ են քասթինգ արել, որոշել, թե ում ձերբակալեն։ Ակնհայտ երևում է, որ պաշտոնյան իրականացնում է խուլիգանություն։ Հաղորդումը ներկայացրել ենք մոտ երկու ժամ առաջ։ Վստահ եմ՝ թե՛ դատախազրությունը, թե՛ քննչականը տեղյակ են՝ ինչ է եղել։ Ուղղակի մտածում են՝ ինչպես ծածկադմփոց անեն խուլիգանությունը»,- ասաց Եփրիկյանը՝ նշելով, որ Չախոյանի ձերբակալումը բողոքարկվելու է։