Օգոստոսի 20-ին Լաս Վեգաս քաղաքի ամենաշքեղ Wynn հյուրանոցում կսկսվի ՄԱՖԻԱ  խաղի 4-րդ Համաշխարհային գավաթը:

Այս սիրված խաղը միջազգային ճանաչում ձեռք բերեց, տարածվեց  և հասավ մինչև Լաս Վեգաս ` ՇԱՐՄԻ շնորհիվ, երբ 1998 թվականին Երևանում բացվեց առաջին ՄԱՖ-ակումբը և միջազգային ՄԱՖԻԱ ակումբների համակարգը: 

Այսօր Մաֆիա հոգեբանական և չափազանց գրավիչ խաղի մասին կպատմի, փորձառու վարող, ճանաչված հաղորդավար, սցենարիստ Հակոբ Ռուբինյանը:

Հակոբ,  մի  քանի բառով կխնդրեմ ներկայացնեք Մաֆիայի կանոնները:

Բացատրել հնարավոր չէ: Այն պետք է դիտել մի քանի անգամ, լսել կանոնների բացատրությունը և այլն: Իմ անձնական փորձից ելնելով (իսկ ես առնվազն մի քանի տասնյակ մարդու սովորեցրել եմ այս խաղը) ավելի արագ և արդյունավետ է, երբ սկսնակին փորձառու խաղացողը կանոնները բացատրում է խաղը դիտելու ընթացքում: Պարզապես ՙօդում՚ բացատրելով այն հնարավոր չէ ամբոջությամբ ընկալել:Խաղի էության մասին լավագույն ասույթը (գոնե ինձ համար) եղել  և մնում է ՙՄաֆիա՚ խաղի աշխարհի չեմպիոններից մեկի, Արմեն Վանյանի արտահայտությունը. ՙՍա մի խաղ է, որը հիմար մարդկանց սովորեցնում է ստել, իսկ խելացիներին` բացահայտել, որ քեզ ստում են՚: Թեև պետք է նկատել, որ այս խաղը հիմարների համար չէ: Այն քիչ թե շատ հաջող խաղալու, խաղից հաճույք ստանալու և մնացած խաղացողներին քո խաղով հաճույք պատճառելու համար, անհրաժեշտ է ունենալ ուղեղ (ոչ պարզապես անատոմիական), տրամաբանություն (ցանկալի է` առողջ), վերլուծելու կարողություն (խոսքը քաղաքականության մասին չէ) և ինտուիցիա (ոչ բոլոր դեպքերում): Եթե դուք ունեք վերոնշյալ հատկությունները (կամ գոնե այդպես եք ենթադրում), ապա փորձեք այս խաղը, և այն ձեզ պարզապես կգերի, հավատացնում եմ:

Ասում են Մաֆիայի արմատները Մասսոնական են:

Ասում են: Մենք Մաֆիայի հետ ծանոթացանք ԿՎՆ-ի տարիներին: Իսկ խաղի ոչ սիրողական, ակումբային պատմությունը սկսվում է 1996 թվականից, երբ բացվեց աշխահում առաջին ՄԱՖ ակումբը` Երևանում: Այնպես որ Հայաստանի մայրաքաղաքը այս համակարգի և հետագայում ամենատարբեր երկրներում ու քաղաքներում բացված ակումբների ՙԱլմա-Մատեր՚-ն է: Հենց այդ պատճառով էլ  ՙՄաֆիա՚ խաղի ամենակարևոր մրցաշարը`աշխարհի առաջնությունը, անցկացվել է, անցկացվում է և միշտ անցկացվելու է բացառապես Երևանում (ի դեպ, այս առաջնությունը մեկնարկեց 2003 թվականին): Թե’ ակումբի, և թե’ համակարգի ստեղծման նախաձեռնողը, կազմակերպողն ու իրականացնողը եղել է Շարմ  ընկերությունը, որը ժամանակին ձևավորվել էր Ուրախների և Հնարամիտների Ակումբի (KBH) Երևանի բժշկական ինստիտուտի թիմի բազայի հիման վրա:

Այսօր, Մաֆ-ակումբներում քանի՞ անդամ կա

Ակումբների անդամների ճշգրիտ քանակը չեմ կարող ասել երկու պատճառնով: Նախ` ՙՄԱՖ-ԱԿՈՒՄԲ՚ համակարգը մասնավոր փակ համակարգ է և բազմաթիվ տվյալներ (այդ թվում անդամների քանակը կամ անձերը) հրապարակման ենթակա չեն: Երկրորդ` համակարգի յուրաքանչյուր ակումբ ինքնուրույն է իր անդամների քանակի որոշման հարցում: Կարող եմ միայն ասել, որ համակարգի յուրաքանչյուր ակումբի պաշտոնական անդամ ազատ մուտք ունի համակարգի բոլոր ակումբներում: Որևէ պատահական անձ ակումբներ մուտք չունի: Միայն, եթե նա ակումբի անդամներից մեկի հյուրն է: Ակումբների քանակը և աշխարհագրությունը շարունակ աճում են: Նշեմ, որ    երևանյան ակումբի ստեղծումից հետո առաջինները բացվեցին Մոսկվա և Լոս-Անջելես քաղաքներում: Դե իսկ վերջին երկուսը բացվել են այս տարի` ԱՄՆ-ի Նյու-Յորք և Հյուստոն քաղաքներում:

Ինչպե՞ս կարելի է դառնալ ակումբի անդամ: 

Միայն ակումբի անդամի հյուրի կարգավիճակում: Դուք կարող եք նաև այդ կարգավիճակում փորձել խաղալ (իհարկե կանոններին և հիմնական դրույթներին ծանոթանալուց հետո): Եվ եթե որոշեք, որ ուզում եք դառնալ այս կամ այն ակումբի անդամ, պետք է դիմեք այն անձին, ով ձեզ հրավիրել է: Նրա խնդրանքով ձեր դիմումը կքննարկվի ակումբի խորհրդում: Սակայն մինչ այդ ձեզ անհրաժեշտ է ունենալ ակումբի խորհրդի մեկ և ակումբի խորհրդատվական խորհրդի երկու անդամների երաշխավորություններ: Սակայն այս ամենն ունենալուց հետո էլ ձեր խնդրանքը կարող են մերժել ակումբի խորհրդի նիստում: Բացի դրանից, ՄԱՖ-ԱԿՈՒՄԲ համակարգի նախագահը կարող է միանձնյա մերժել դիմումը անգամ բոլոր ինստացիաներն անցնելուց հետո:Բնականաբար հարց է ծագում, թե ինչու՞ է այդքան բարդ այս հարցը: Բանն այն է, որ Ակումբի արարողակարգի, կանոնակարգի, խաղի օրենքների և կանոնների յուրաքանչյուր կետ անցել է երկար ճանապարհ, հղկվել է, փոփոխվել՝ ունենալով ամենատարբեր նախադեպեր: Արդյունքում մշակվել է էթիկական նորմերի և կանոնների այնպիսի մի համակարգ, որի շուրջ հավաքվում են մարդիկ, ում դա ընդունելի է և հաճելի: Ի դեպ, այս ամենը թող ամպագոռգոռ չթվա: Հավատացնում եմ, որ մեր ակումբներին ձեր հնարավոր անդամությունը ոչ մի բարդություն չի ներկայացնի, եթե ձեր անձնական հատկանիշները համահունչ են Ակումբի էթիկական նորմերին: Լավ կամ վատ, հաջող կամ ոչ այնքան խաղալը այս հարցում առաջնային նշանակություն չունեն:

Իսկ գավաթին մասնակցելու պայմանները տարբերվո՞ւմ են

Լաս Վեգասի ՄԱՖԻԱ խաղի Աշխարհի Գավաթի խաղարկությունը մեկնարկեց 2012 թվականին: ՄԱՖԻԱ խաղի մնացած բոլոր առաջնություննեից և մրցույթներից այս մեկը տարբերվում է երկու կարևոր կետով. նախ, կարող են մասնակցել բոլոր ցանկացողները: Ակումբի անդամությունը պարտադիր չէ: Եվ, երկրորդ, այստեղ խաղարկվում է դրամական մրցանակ (ինչպես և ամենուր և ամեն ինչ Լաս Վեգասում): Խորհուրդ կտայի բոլորին, ով նախընտրում է հաղթել իր խելքի շներհիվ և հույսը չի դնում միայն կույր հաջողության վրա, միանալ մեզ մյուս տարվա գավաթին: Բավականին մանրամասն ՄԱՖԻԱ խաղի հետ կարելի է ծանոթանալ www.mafclub.am և www.mafworldcup.com  կայքերում, կամ Facebook-ի միջոցով:

Ա. Գրիգորյան,

Լոս Անջելես