«Ժամանակին նորմալ հոդվածներով էին գալիս, հիմա՝ մի քիչ ծիծաղելի։ Ինչ-որ քրեական գործի շրջանակներում խուզարկություն են իրականացնում՝ ԴԱՀԿ-ի պահանջները չկատարելու համար»,- լրագրողների հետ զրույցում ասել է ՀՅԴ ԳՄ անդամ, «Հայաստան» դաշինքի անդամ Իշխան Սաղաթելյանը։ «Բավականին մեծ խմբով էին եկել, ամբողջ շենքը շրջափակել էին։ Առգրավեցին տան զարդերը, կանխիկ գումար։ Ընդամենը կարող եմ ասել, որ հերթական ապօրինի գործընթացն է»,- նշել է ընդդիմադիր գործիչը։

Հիշեցնենք, որ այսօր վաղ առավոտյան իրավապահները խուզարկություն են իրականացրել Սաղաթելյանի բնակարանում:

***

ՀՅԴ Հայաստանի ԳՄ ներկայացուցիչ Իշխան Սաղաթելյանի տուն իրավապահները ներխուժել են «ԴԱՀԿ պահանջը» չկատարելու պատրվակով: Գիտեմ, որ ծիծաղելի է, գրել է «Հայաստան» խմբակցության անդամ Քրիստինե Վարդանյանը։

«Այս պահին խուզարկությունն ավարտված է, կա քրեական գործ, Իշխան Սաղաթելյանը հրավիրվել է հարցաքննության»,-նշել է նա։

***

«Այս պահին քրեական գործ է հարուցված, դեռ կարգավիճակ չունեմ, բայց կարծում եմ՝ կունենամ. կանչել են հարցաքննության։ Բոլոր հնարավոր միջոցներով մեր իրավունքները պաշտպանելու ենք»,- լրագրողների հետ զրույցում հայտնեց ընդդիմադիր գործիչ Իշխան Սաղաթելյանը, ում տանն ու ավտոմեքենայում այսօր առավոտյան խուզարկումներ են իրականացվել։ «Մենք ցանկացած սցենարի պատրաստ ենք. այս մեթոդներով իրենք հաջողության չեն հասնելու»,- նշեց Սաղաթելյանը։