ՌԴ ԱԳՆ խոսնակ Մարիա Զախարովան անդրադարձել է իշխանության կողմից գործարար Սամվել Կարապետյանի հետապնդումներին՝ հիշեցնելով վարչապետ Նիկոլ Փաշինյանի՝ 2018 թվականի կոչերը։ Այս մասին հայտնել է НТВ-ն։
Զախարովայի խոսքով՝ 7 տարի առաջ բողոքի ցույցերի ժամանակ Փաշինյանը երկրի իշխանություններին կոչ էր արել հանձնվել ցուցարարներին։
«Կցանկանայի մեջբերել Նիկոլ Փաշինյանի՝ 2018 թվականին Երևանում կայացած հանրահավաքի ժամանակ ասված խոսքերը․ «Իշխանությունները պետք է անվերապահորեն և առանց պայմանների ճանաչեն մեր հեղափոխության հաղթանակը և չցուցաբերեն իշխանության ղեկին մնալու որևէ ցանկություն․.», - ասել է Զախարովան։

Դիվանագետը նշել է նաև, որ չորեքշաբթի ՀՀ իրավապահ մարմինների աշխատակիցները մեղադրանք են առաջադրել Կարապետյանին՝ իշխանությունը զավթելու կոչերի համար։

«Հիմա մենք լսում ենք, թե ինչպես են Երևանում, ըստ Կարապետյանի փաստաբանի, սկսել մեղադրել ռուս գործարարին իշխանափոխության ինչ-որ կոչերի մեջ։ Ես պարզապես մեջբերել եմ Հայաստանի Հանրապետության ղեկավարին», - հավելել է Զախարովան։