Ս/թ մայիսի 31-ին Երևանի Շառլ Ազնավուրի անվան հրապարակում «Հայաստանի պատանեկան նվաճումներ » (ՀՊՆ) կազմակերպությունն իրականացրեց «Աշակերտական գործարար ընկերությունների (ԱԳԸ) տոնավաճառ» ամենամյա միջոցառումը, որը կազմակերպվել էր «Ձեռնարկատիրական կրթություն» ծրագրի շրջանակներում: «Հայաստանի պատանեկան նվաճումներ» կազմակերպության կողմից իրականացվող այդ ծրագիրը ֆինանսավորվում է JHM բարեգործական և HSBC բանկի կողմից:
Տոնավաճառին մասնակցեցին 18 աշակերտական գործարար ընկերություններ հանրապետության բոլոր մարզերից: Աշակերտների կողմից հիմնադրված այդ ընկերությունների գործունեությունը կազմում է «Ձեռնարկատիրական կրթություն» դասընթացի կարևորագույն բաղադրիչը, քանի որ հենց դրանց միջոցով են աշակերտները ձեռք բերում ոչ միայն կայուն և հարուստ տնտեսագիտական գիտելիքներ, այլ նաև կարևոր բիզնես հմտություններ:
Այդ աշակերտական ընկերությունները բիզնես գործունեություն են իրականացրել ողջ ուստարվա ընթացքում՝ հնարավորություն տալով աշակերտներին կատարել պրակտիկ ձեռնարկատիրական գործողություններ. հիմնադրել բաժնետիրական ընկերություններ, նշանակել ընկերության կառավարիչներին, ընկերության կանոնադրական կապիտալը հավաքելու և գումար ձեռք բերելու նպատակով թողարկել և վաճառել ընկերության բաժնետոմսերը, վարել շուկայական հետազոտություններ, գրել և մշակել բիզնես պլան, կազմակերպել ապրանքի կամ ծառայության արտադրությունը և ապա վերջում՝ զբաղվել դրանց վաճառքով և իրացումով:
Վերոհիշյալ տոնավաճառի կազմակերպումն էլ հենց աշակերտներին հնարավորություն ընձեռեց իրենց ընկերությունների արտադրանքները ներկայացնել սպառողներին, և ցուցադրել այն գործարար – ձեռներեցական հմտությունները, որոնք ձեռք են բերել ուսումնառության ընթացքում:
Հարուստ և բազմազան էր աշակերտների կողմից տոնավաճառին առաջարկված տեսականին` զարդեր, խոհանոցային և դպրոցական պարագաներ, խաղալիքներ, հուշանվերներ: Իսկ տոնավաճառից գոյացած դրամական միջոցների մի մասը աշակերտները ձեռնարկատիրական և կորպորատիվ սոցիալական պատասխանատվության ծրագրի շրջանակներում ուղղելու են հանրային տարբեր ձեռնարկների իրականացմանը
Տոնավաճառի բարեհաջող ընթացքն ապահովելու գործում աշակերտներին մեծ աջակցություն ցուցաբերեցին HSBC բանկի կամավորները, ովքեր ծրագրում ընդգրկվել էին որպես բիզնես-խորհրդատուներ: Հենց տոնավաճառի սկզբից նրանք միացան աշակերտական խմբերին և օգնեցին ոչ միայն ձևավորել տաղավարները, այլ նաև մշակել ճիշտ մարկետինգային ռազմավարություն և սպառողներին պատշաճորեն ներկայացնել բիզնես –պլանը:
Հաշվի առնելով Ձեռնարկատիրական կրթության կարևորությունը և արդիականությունը՝ 2017-2018 ուստարում՝ այն ներդրվեց դեռևս 2-րդ և 3-րդ դասարաններում՝ որպես ինտեգրված բաղադրիչ Տեխնոլոգիա առարկայի շրջանակներում:
Մանրամասն տեղեկությունների համար կարող եք այցելել «Հայաստանի պատանեկան նվաճումներ»
կազմակերպության վեբ կայք` www.jaarmenia.org:
