«Մաքուր Հայաստան» ծրագրի շրջանակներում ՀՀ ոստիկանության կողմից իրականացվել են մի շարք միջոցառումներ՝ հանրապետության տարածքում չսահմանված եւ (կամ) չնախատեսված տեղերում ու վայրերում աղբ թափելու դեպքերը բացառելու նպատակով:
Այս մասին հայտնում են ՀՀ ոստիկանությունից եւ ներկայացնում իրականացված աշխատանքները.
- Սպասարկվող վարչական տարածքում չսահմանված վայրերում աղբի կուտակումներ հայտնաբերելիս ձեռնարկվել են գործուն միջոցներ աղբը թափողի ինքնությունը պարզելու ուղղությամբ եւ այդ մասին իրազեկվել է տարածքային կառավարման եւ տեղական ինքնակառավարման մարմիններ։
- Չսահմանված վայրերում աղբը թափող անձի ինքնությունը հայտնի լինելու պարագայում վերջինիս տրամադրվել է սեղմ ժամկետ՝ իրավախախտման հետեւանքները վերացնելու համար եւ այդ մասին իրազեկվել է տարածքային կառավարման եւ տեղական ինքնակառավարման մարմիններ։
- Ավտոճանապարհներին ճանապարհապարեկայնի ծառայություն իրականացնելիս տրանսպորտային միջոցից իրեր եւ առարկաներ նետելու, ինչպես նաեւ տրանսպորտային միջոցների վարորդների կողմից բեռների փոխադրման կանոնները խախտելու դեպքերով օրենքով սահմանված կարգով կազմվել են վարչական իրավախախտման վերաբերյալ արձանագրություններ։
- «Մաքուր Հայաստան» ծրագրի շրջանակներում համայնքային խորհուրդների հետ համագործակցելով՝ ոստիկանության կողմից ազգաբնակչության շրջանում տարվել են բացատրական աշխատանքներ՝ բնակավայրերում, ճամփեզրերին, հանգստի եւ ժամանցի գոտիներում աղբ թափելու դեպքերը բացառելու ուղղությամբ։
- Սպասարկվող երթուղիներում՝ առավելապես հանգստի եւ ժամանցի գոտիներում, զբոսաշրջության վայրերում, քաղաքացիների կողմից աղտոտումը կանխելու նպատակով հրահանգավորվել են ՊՊԾ վերակարգերը։
- Սպասարկվող վարչական տարածքներում տնտեսվարող սուբյեկտների՝ առեւտրի, սննդի, ժամանցի, հանգստի, ինչպես եւ մյուս կազմակերպությունների տնօրինությանը ոստիկանության կողմից խիստ նախազգուշացվել է՝ իրենց կողմից վերահսկվող եւ հարակից տարածքները մաքուր պահելու ուղղությամբ։
- Հասարակական վայրերում եւ ավտոճանապարհներին աղբի կուտակումները վերացնելու նպատակով միջնորդագրեր են ներկայացվել տարածքային կառավարման կամ տեղական ինքնակառավարման մարմիններ։
Այսպիսով՝ կատարված աշխատանքների ընթացքում հայտնաբերվել է․
- Չսահմանված վայրերում աղբ թափելու 685 դեպք,
- Չսահմանված վայրերում աղբ թափող 347 անձ,
- Հայտնաբերված իրավախախտումների դեպքերից վերացվել է 308-ը,
- Միջնորդագրեր են ուղարկվել ՏԻՄ մարմիններ՝ 139։
- Ճանապարհային ոստիկանության ճանապարհապարեկային ծառայության անձնակազմի կողմից ՀՀ ՎԻՎ օրենսգրքի համապատասխան հոդվածների հատկանիշներով կազմվել է 287 արձանագրություն:
Հիշեցնենք, կառավարության ապրիլի 20-ի նիստում Դիմելով Վլադիմիր Կարապետյանին վարչապետն ասել էր. «Շատ լավ, ոնց պատկերացնում եք՝ արեք, բռնում եք, ասում եք՝ լսի, հավաքի, գնա: Մենք տաս օր հետո ուրիշ ռեժիմ ենք ունենալու»:
