Արդեն տեղեկացրել ենք, որ «Անտիկյան» ցուցասրահի նախաձեռնությամբ հուլիսի 29-ին Երևանում Արամի 42/1 հասցեում գտնվող Jean-Paul Existential սրճարանում, ՀՀ վաստակավոր նկարիչ Արարատ Սարգսյանը ներկայացրել է «Տղա Դավթի եւ աղջիկ Խանդութի հեքիաթը» պերֆորմանսը.
«Ես մի օր պատահաբար իմացա, որ գոյություն ունի «Սասնա ծռեր» էպոսի 5 հատոր, յուրաքանչյուրը 1000 էջից բաղկացած: Դրանցում ընդգրկված է 75 պատմություն, որոնք սկսեցի հերթով ուսումնասիրել: «Տղա Դավթի և աղջիկ Խանդութի հեքիաթը» շատ հավանեցի: Ինձ գրավեց այդ ստեղծագործությունում առկա թափառող սյուժեները»:
Հեղինակը սկզբում նկատել է, որ 75 պատմվածքներից որևէ մեկն իրեն հարազատ բարբառով գրված չէ և խնդրել է Ռոզա Ավետիսյանին, որ Սասնո բարբառով գրված էպոսը վերափոխի էրզրումի բարբառի և գյումրվա խոսվածքի:
«Պատրաստեցի 18 գլանակ, որոնք համապատասխանում են «Տղա Դավթի և աղջիկ Խանդութի հեքիաթի» 18 գլուխներին: Տպեցի կավե տախտակների վրա և վերջին 3 տարվա ընթացքում եվրոպական երկրներում ներկայացրեցի դրանք»,-պատմում է հեղինակը և նշում, որ իր նախագծերն առավել շատ ներկայացվում են եվրոպական երկրներում, քան Հայաստանում:
Նշենք, որ նրա ստեղծագործությունները ցուցադրվել են միջազգային ցուցահանդեսների շրջանակներում՝ ընդհուպ Վենետիկի բիենալեում (2013 թվականին):
Ստորև առաջարկում ենք դիտել «Տղա Դավթի եւ աղջիկ Խանդութի հեքիաթը» պերֆորմանսի մասին պատմող տեսանյութը:
Կարդացեք նաև` 18 գլանակով ներկայացրել է «Տղա Դավթի և աղջիկ Խանդութի հեքիաթը»
