ԱՄՆ-ի նախագահ Դոնալդ Թրամփը հաստատել է, որ անձամբ խնդրել է ՖԻՖԱ-ի նախագահ Ջանի Ինֆանտինոյին վերանայել ԱՄՆ-ի հավաքականի հարձակվող Ֆոլարին Բալոգունին 2026 թվականի Աշխարհի առաջնության ժամանակ տրված կարմիր քարտը։ Նա այդ մասին հայտարարել է երկուշաբթի՝ հուլիսի 6-ին, Սպիտակ տանը լրագրողների հետ հանդիպման ժամանակ։

Թրամփը շեշտել է, որ «սարսափելի մրցավարի» որոշումը համարում է անհիմն։ «Ես վերանայում եմ խնդրել միայն այն պատճառով, որ չեմ կարծում, որ կանոնների խախտում է եղել»,- լրագրողներին ասել է ԱՄՆ-ի նախագահը Օվալաձև աշխատասենյակում կայացած ճեպազրույցի ժամանակ։

ԱՄՆ-ի հավաքականի հարձակվող և հիմնական խաղացող Ֆոլարին Բալոգունը կարմիր քարտ է ստացել Բոսնիա և Հերցեգովինայի դեմ 1/16 եզրափակչի խաղում։ Նա ընթացիկ մրցաշարում խփել է երեք գոլ՝ երկու գոլ խմբային փուլի Պարագվայի դեմ խաղում և մեկ գոլ Բոսնիա և Հերցեգովինայի դեմ խաղում։

2026 թվականի Աշխարհի առաջնության կանոնների համաձայն՝ նա պետք է բաց թողնի Բելգիայի դեմ 1/8 եզրափակիչի խաղը, որը կկայանա երեքշաբթի՝ հուլիսի 7-ին։ Սակայն, մեկ օր առաջ հայտարարվեց, որ ՖԻՖԱ-ն աննախադեպ քայլ է ձեռնարկել՝ կասեցնելով Բալոգունի որակազրկումը՝ այն փոխարինելով մեկ տարվա փորձաշրջանով։

Associated Press-ի և բրիտանական GiveMeSport հրատարակության տվյալներով՝ ՖԻՖԱ-ն այս քայլը ձեռնարկել է Սպիտակ տնից ստացված զանգից հետո։ Թրամփը ողջունել է չեղարկումը։ «Շնորհակալություն ՖԻՖԱ-ին՝ ճիշտ բանը անելու և լուրջ անարդարությունը շտկելու համար», - գրել է նա TruthSocial սոցիալական ցանցում։

***

ՖԻՖԱ-ի նախագահը հայտարարել է, թե ԱՄՆ-ի նախագահ Դոնալդ Թրամփի զանգը ոչ մի կերպ չի ազդել ամերիկացի հարձակվող Ֆոլարին Բալոգունի որակազրկման որոշումը կասեցնելու վրա, ինչի դեմ Բելգիան բողոքարկում է ներկայացրել։

«ՖԻՖԱ-ի դատական մարմիններն անկախ են»,- պնդել է Ջաննի Ինֆանտինոն, հավելելով, թե նույնն է ասել նաև Դոնալդ Թրամփի հետ հեռախոսազրույցի ժամանակ։

«Ես բացատրեցի, որ գործը պատշաճ կերպով կլուծվի իրավասու մարմինների կողմից։ Այսպես է գործում ՖԻՖԱ-ի համակարգը, և սա սկզբունք է, որը ես միշտ կպահպանեմ», - նշել է նա։

24-ամյա ամերիկացի ֆուտբոլիստը Բոսնիա-Հերցեգովինայի հետ խաղի ժամանակ կարմիր քրատ էր ստացել՝ բոսնիացիների պաշտպան Թարիկ Մուհամերովիչի ոտքին հարվածելու համար և պետք է բաց թողներ առնվազն մեկ հանդիպում։ ՖԻՖԱ-ի Կարգապահական կոմիտեն, սակայն, երեկ հայտարարեց, թե մեկ խաղի որակազրկումը փոխարինում է մեկ տարվա փորձաշրջանով:

Լրատվամիջոցները հաղորդել էին, որ այդ որոշումը կայացվել էր Թրամփի հեռախոսազանգից հետո։ ԱՄՆ նախագահ Դոնալդ Թրամփը հաստատել էր, որ խնդրել է ՖԻՖԱ-ի նախագահին վերանայել պատժամիջոցը։