«Մենք ունեինք շատ վատ իրավիճակ թե՛ Ցեղասպանության թանգարանում, թե՛ հուշահամալիրում։ Ժամանակին ջրահեռացման համակարգ չի եղել, մենք ունեինք իրավիճակ, երբ անձրևաջրերը հոսում էին, որը լրջագույն խնդիրներ էր բարձրացնում նաև հուշահամլիրի հետագա ամրության և պահպանման համար»,- ասուլիսի ժամանակ նշել է ԿԳՄՍ նախարար Ժաննա Անդրեասյանը։ Նա հայտնել է․ որ Ցեղասպանության հուշահամալիր-թանգարանի անհրաժեշտ աշխատանքների իրականացման համար պետությունը հատկացրել է շուրջ 800 միլիոն դրամ։

«Օրենսդրության բոլոր պահանջները պահպանված են։ Ցեղասպանության թե՛ հուշահամալիրը, թե՛ թանգարանը ամբողջությամբ նույն տեսքով վերականգնվելու են անհրաժեշտ աշխատանքներից հետո։ Բուն աշխատանքների իրականացման համար շուրջ 300 օր է հատկացված»,- հավելել է Անդրեասյանը։

***

«Վերջին շրջանում մեզ հաճախ են դիմում Ղարաբաղից տեղահանված ընտանիքներ՝ նշելով, որ պետությունը նախորդ տարի ունեցավ որոշում՝ ուսման վարձի փոխհատուցման համար կրթարթոշակ տրամադրվեց 1-ին կուրս ընդունվածներին: Այս քաղաքականությունը կշարունակվի»,- այս մասին ասուլիսի ժամանակ ասաց ԿԳՄՍ նախարար Ժաննա Անդրեասյանը:

«Այս քաղաքականությունը կշարունակվի, այսինքն՝ բոլոր նրանք, ովքեր ընդունվել են առաջին կուրս բարձրագույն կրթության մակարդակում, մենք խոսում ենք 240 ուսանողի մասին՝ մեր տվյալներով, և նրանք, ովքեր ընդունվել են ՄԿՈՒ համակարգ (վճարովի համակարգով), կստանան կրթաթոշակ ուսման վարձի փոխհատուցման համար»,- նշեց նախարարը՝ հավելելով՝ այսինքն՝ նրանք, ովքեր արդեն ընդունվել էին և ստանում էին, այս ծրագրի շահառու էին, իսկ նրանք, ովքեր նոր են ընդունվում, նրանց համար պետությունը նույնպես կկիրառի այս քաղաքականությունը նույն պայմաններով։

***

2025-2026 ուսումնական տարվա ընդունելության արդյունքներով թափուր տեղերի թիվը 5 անգամ պակաս է 2024 թվականի ցուցանիշից: Այս մասին այսօր հրավիրված ասուլիսում նշեց ԿԳՄՍ նախարար Ժաննա Անդրեասյանը:

«Եթե 2024 թվականին թափուր էր մնացել 6174 տեղ, ապա այս տարվա ընդունելության արդյունքներով թափուր տեղերի թիվը 1174 է: Ընդ որում՝ անվճար թափուր տեղերի կամ պետության փոխհատուցմամբ թափուր տեղերի թիվը ընդամենը 219-ն է»,- նշեց նախարարը։